Les intrigues de Sylvia Couski ye la película más urbana y abierta de les tres escoyíes pal nuesu focu d’Ado Arrieta, una fiesta poblada de personaxes memorables que van, vienen, tresfórmense (en zíngara, en fada, n’escultura) y floten despreocupaos sobre una trama de celos y revanches ente un escultor y la so exmuyer. Protagonizada pol mesmu Arrieta y una Marie-France arrolladora Les intrigues pue vese como una semeya del París post 68 baxo una óptica que per momentos paecería documental ensin perder en nengún momentu esa máxica irrealidá que clisa la mirada y que ye tan propia nel cine d’Arrieta.