Del 15 al 23 de payares, el Festival Internacional de Cine de Xixón afítase na so 62ª edición como la gran fiesta y el puntu d’alcuentru del cine dafechu independiente, calteniendo la so apuesta por eses películes qu’ufierten una mirada personal y xenuina y que, na so gran mayoría, nun tienen asegurada la visibilidá. Esi cine que convién ver en Xixón, equí y agora porque podría nun llegar a sales comerciales o plataformes online. Cine alternativu, sorprendente y humanu que revela y emociona.

El FICX ye un certame conxugáu en presente que mira al futuru: frente a la cantidá, la calidá; frente a l’acumulación, la esbilla; frente a la despersonalización, l’averamientu; frente a la competitividá, la collaboración y la implementación d’acciones concretes con otros certámenes, nuna clara apuesta pola sostenibilidá en cuantes a formatu y recursos. Más p’allá de convencionalismos, etiquetes y alderiques sobre xéneros y narratives, el Festival de Xixón vuelve apostar por un cine honestu, un cine d’hestories que se somorguia nel ayeri y saca a flote’l güei pa reconstruyir el mañana.