Del 15 al 23 de payares el FICX va proyeutar un total de 169 títulos de cineastes de prestixu y nuevos talentos, afitándose como ún de los festivals de referencia pal cine independiente internacional. La so programación fadráse estensiva a les sales favoreciendo alcuentros ente públicu y cineastes y cuntará, amás, con esposiciones y actividaes complentaries que suponen un arriquecimientu na ufierta cultural de la ciudá.

Julián López xubiráse a les tables del Teatru Xovellanos pa presentar la gala inaugural del FICX

Julián López sedrá l’encargáu de conducir la gala d’inauguración, que tendrá llugar el 15 de payares a les 19:30 hores nel Teatru Xovellanos. L’actor, del que destaca va poco la so ponderosa interpretación en Los destellos de Pilar Palomero (programada nos Pases Especiales del FICX), entamó la so trayeutoria como co-creador y intérprete d’un programa televisivu que marcó a una xeneración entera, La hora chanante, y darréu en Muchachada Nui o Museo Coconut. Ente los créitos actorales de López destaquen películes como Pagafantas de Borja Cobeaga, La tribu de Fernando Colomo o Dolor y gloria de Pedro Almodóvar, ente otres.

_{Julián López, presentador de la gala de inauguración}

Nel eventu, el precursor del cine underground español y francés, Ado Arrieta va recibir el Premiu d’Honor FICX 2024. Per otru llau, Rossy de Palma recibirá’l V Premiu Isaac del Rivero. La icónica actriz, modelu y cantante de madre avilesina, obtendrá n’honor a la so rellumante trayeutoria esti reconocimientu que lleva’l nome del creador del Festival Internacional de Cine de Xixón.

_{Ado Arrieta, Premio de Honor FICX 2024}

_{Rossy de Palma, V Premio Isaac del Rivero (Foto: Manuel Otomuro)}

El pistoletazu de salida a la programación d’esti añu va dalu’l curtiumetraxe La causa del accidente que provocó el incendio de Lope Serrano, una producción de CANADA que cunta colos cameos de los cineastes J.A. Bayona y Albert Serra y con un repartu de lluxu compuestu por Bárbara Lennie, Berta Prieto y Omar Ayuso. El curtiu precederá a la proyeición del llargumetraxe musical ¡Gloria! (Italia), aclamáu al so pasu pela Berlinale y nel que l’actriz y cantautora italina Margherita Vicario aniciase na direición homenaxando l’alcordanza de les muyeres compositores a lo llargu de la hestoria. La película proyéutase en collaboración cola Direición Xeneral d’Igualdá de Muyeres y Homes del Ayuntamientu de Xixón.

Pela so parte, l’actu de clausura va ser conducíu pola actriz y presentadora Arantxa Nieto. Nel mesmu, l’actriz danesa Lone Fleming obtendrá’l Premiu Especial Xeneración Mutante en reconocencia a una radiante y estensa trayeutoria con más de 40 películes; la direutora y guionista catalana Carla Simón (Estiu 1993, Alcarràs)llevará’l Premiu Comadre de Cine 2024 concedíu en collaboración cola Tertulia Feminista les Comadres; y la direutora, guionista, actriz y productora griega Athina Rachel Tsangari recibirá’l Premiu d’Honor FICX 2024.

_{Lone Fleming, Premio Especial Generación Mutante}

La película que pondrá’l pieslle d’oru a la 62ª edición sedrá Silent Trilogy (Finlandia) de Juho Kuosmanen: un entreteníu trípticu de curtiumetraxes y una esceicional oda al cine mudu.

Importantes personalidaes de los ámbitos del cine y la cultura valorarán les películes a concursu

El Xuráu Internacional Albar d’esta 62ª edición fórmenlu la direutora y guionista ganadora del Goya Belén Funes, el profesor y cineasta (tamién ganador del Goya)  Sergio Oskman y el críticu, realizador y programador (anterior Xefe de Programación de la Berlinale) Mark Peranson.

El Xuráu de la Crítica Internacional FIPRESCI, que s’encargará esti añu de valorar les películes de la Seición Oficial Retueyos, ta formáu pola periodista y caderalga rumana Dana Duma y los escritores y críticos cinematográficos españoles Carles M. Agenjo y Jose Antonio Teodoro.

La cineasta y profesora María Royo, la xestora cultural y codireutora del Festival Internacional de Curtiumetraxes Vienna Shorts Doris Bauer, y la coordinadora del departamentu de música y audiovisuales de La Casa Encendida Rocío Mateo-Sagasta, formen el Xuráu de la Seición Oficial de Curtiumetraxes.

La competencia tresversal Tierres en Trance sedrá valorada pol cineasta Tito Montero, el programador y realizador Claudio Zilleruelo y la direutora y productora Sonia Bautista-Alarcón.

Integren el Xuráu de Cine Español la cineasta Celia Rico Clavellino (que protagoniza ún de los focos del 62 FICX), la Direutora del Festival de Cine Español d’Amsterdam Virginia Pablos, y la xestora cultural y programadora de cine del Muséu d’Arte Contemporaneu de Castiella y Lleón Esther González Couso.

El Premiu al Meyor Llargumetraxe dirixíu por una muyer va decidilu’l Xuráu CIMA compuestu pola direutora Teresa Marcos, la tamién direutora y productora, premiada en Berlín, Almudena Carracedo y Ainhoa Bolaños,guionista, direutora y productora executiva.

El Xuráu de los Premios RTPA Asturies Curtiumetraxes y Premio RTPA al Meyor Llargumetraxe Asturianu ta formáu por Francisco González Orejas, Direutor Xeneral de Radio y Televisión del Principáu d’Asturies (RTPA); Graciela Mier, Presidenta de l’Academia del Cine Asturianu; y Ana Isabel Suárez, Coordinadora de la Muestra de Cine Social y Derechos Humanos d’Asturies (MUSOC).

El Xuráu Mozu, compuestu por mozos y moces ente 17 y 25 años, concederá un Premiu al Meyor Llargumetraxe de Seición Oficial Retueyos y otru al Meyor Curtiumetraxe de Seición Oficial.

El Premiu Nuevos/es Realizadores del Principáu d’Asturies fallarálu’l xuráu integráu por Alejandro Díaz Castaño, Direutor del FICX; Isabel Lugilde, Direutora del CISLAN; Lucía Herrera, Direutora d’Antena de RTPA; Francisco de Asís Fernández Olanda, Direutor Xeneral de Mocedá del Principáu d’Asturies y Samu Fuentes, direutor de cine.

El Xuráu SEMILLERU Lab que valorará los proyeutos en fase de desendolcu compónenlu Valeria Wagner y Marcello Paolillo; y les obres en postproducción sedrán premiaes por Chiara Lentz, Laure Bonville y Vanessa Ruiz-Larrea.

Cuasi 200 cineastes pasarán pela ciudá nel FICX

Del 15 al 23 de payares, la ciudá cuntará cola presencia de cuasi 200 personalidaes del audiovisual ente les que s’alcuentren les premiaes Rossy de Palma, Lone Fleming, Carla Simón y Athina Rachel Tsangari; los/les directores protagonistes de los Focos del FICX ente quien ta’l tamién homenaxáu Ado Arrieta, Celia Rico Clavellino y Gala Hernández López.Direutores como Radu Jude, Albert Serra y Montse Triola, Konstantina Kotzamani, Mitra Farahani, Guillaume Brac, Margherita Vicario, Matthias Glasner, Rúnar Rúnarsson, Arnaud y Jean-Marie Larrieu, Roberto Minervini, Hernán Rosselli, Masakazu Kaneko, Javier Van de Couter, Raha Raz Ghashghai, Antón Álvarez (conocíu na so faceta musical como C. Tangana), Pilar Palomero, Pablo Hernando, Javier Rebollo, Andrea Jaurrieta, Cristóbal Arteaga, Enrique Buleo, Alex Reynolds, Maider Fernández Iriarte, Iratxe Fresneda, Juan Palacios, María Abenia, Abel García Roure, Ander Iriarte o Amaia Merino; y intérpretes como Ingrid García-Jonsson, Ramón Barea, Assumpta Serna, Maru Valdivielso, Flipy, Julián López o Joaquín Reyes, ente otres munches figures relevantes, daránse cita na ciudá.

_{Athina Rachel Tsangari, Premio de Honor FICX 2024}

Completen la programación de los Pases especiales del FICX seis títulos imprescindibles

La direutora Athina Rachel Tsangari, productora de los primeros trabayos de Yorgos Lanthimos (Canino, Alps) y Premiu d’Honor del FICX 2024, presenta n’Harvest (Reinu Xuníu, Alemaña, Grecia, Francia, EE.XX.) una guapa y escura fábula protagonizada por Caleb Landry Jones que radiografía la sociedá agrícola preindustrial; una adaptación de la novela homónima de Jim Crace que tuvo’l so entrenu na Seición Oficial del Festival de Venecia.

_{Harvest de Athina Rachel Tsangari}

Pilar Palomero amuésase en Los destellos (España) como una de les cineastes más interesantes del nuesu páis. Emocionante y conmovedora, la película cuenta coles rellumantes interpretaciones de Patricia López Arnaiz (Meyor interpretación protagonista nel Festival de San Sebastián), Antonio de la Torre y Julián López. En FICX proyectaráse en collaboración cola Direción Xeneral d’Igualdá de Muyeres y Homes.

_{Los destellos de Pilar Palomero}

En la alcoba del sultán (España, Francia) ye l’últimu y esperáu llargumetraxe de Javier Rebollo. El direutor deLa mujer sin pianoreconstruye y/o fantasia cola posible hestoria de Gabriel Veyre, operador del cinetógrafu de los hermanos Lumière qu’inmortalizó la realidá d’una época colos sos viaxes pel mundu. Pilar López de Ayala y Jan Budar protagonicen esti personalísimu homenaxe al cine d’aventures, guapamente fotografiáu por Santiago Racaj.

_{En la alcoba del sultán de Javier Rebollo}

En Xeneración Xixón Sound (España) el realizador asturianu Aure Roces fai un perfondu análisis d’esti movimientu cultural precursor de la música indie n’España que surde na ciudá del FICX a primeros de los años 90 al rodiu de grupos Manta Ray, Australian Blonde, Nosoträsh, Pauline en la playa o Doctor Explosión. La película tendrá’l so estrenu absolutu nel Festival.

La gran manzana (España) de David de la Cruz  ye tamién un llargumetraxe asturianu que tendrá’l so estrenu mundial nel FICX. La película convida a siguir el percorríu de la sidra dende’l so orixe a una pequeña pumarada familiar hasta la so llegada a les cais de Nueva York.

Un añu más el FICX cuenta nos sos Pases Especiales cola película escoyida pol crítiu cinematográficu Alejandro G. Calvo en collaboración con SensaCine. Rolling Thunder (El ex-preso de Corea) (Estaos Xuníos, 1977) de John Flynn ye la hestoria de venganza d’un soldáu que torna pa Texas dempués de la Guerra de Vietnam. Amás de cuntar con un guión firmáu por  Paul Schrader (autor de los de Taxi Driver y Toro Salvaje), Quentin Tarantino almitió por ella una auténtica devoción.

El 62 FICX ufiertará un ampliu abanícu d’Actividaes complementaries

Esti añu, el Festival duplica la ufierta d’Actividaes complementaries con respeuto a ediciones anteriores, marcándose asina como una de les más destacaes na hestoria del eventu gracies a un bultable incrementu na so ufierta, que cuntará con un total de 28 actividaes complementaries que, sumaes a la programación del reconocíu llocal Toma 3 y a les FICX Nights, amuesen una medra significativa respeuto a otros años.

Ente les actividaes programaes inclúyense cinco atractives esposiciones que formarán parte de la ufierta programática estensible a les sales. Ente ells, atópase la yá anunciada A veces nuestra historia muere antes que nosotros. Jean-Luc Godard, los cinco cuadernos de Scénario, que revela los cuadernos de trabayu de la que diba ser la obra definitive de Jean-Luc Godard. L’amuesa, comisariada pola pintora y cineasto iranina Mitra Farahani, inauguraráse’l día 15 de payares na Sala 3 del Centru Cultura Antiguu Institutu Xovellanos.

Carteles de cine en la colección Muséu del Pueblu D’Asturies (1932-1987) amosará una esbilla de les últimes compres de la sede del Archivu d’Hestoria Oral d’Asturies; Xixón, una ciudad de cine(s), comisariada pol Doctor en Xeografía Rafael Suárez-Muñiz, ufiertará na Sala 1 del Antiguu Institutu una completa muestra de la evolución de tolos cines qu’esistieron en Xixón con oxetos y materiales orixinales d’estos espacios; Mujeres en el cine: un legado de talento en el FICXcelebra la valiosa contribución de les muyeres cineastes nel FICX per aciu d’una cuidada esbilla de semeyes del alumnáu del CISLAN que podrá vese nel Espaciu Astragal Conseyu de la Mocedá de Xixón; y Obni-Objeto Berde no identificado plantea una reflexón sobre lo desconocío, lo oculto, lo marxinal y lo sorprendente que tará espuesta na galería Espaciu Llíquidu en collaboración cola Asociación Berde.

La direutora Carla Simón, homenaxada col Premiu Comadre de Cine 2024 y ganadora del Osu d’Oru na Berlinale por Alcarràs en 2022, impartirá una Masterclass abierta al públicu’l 23 de payares nel Salón d’Actos de l’Antigua Escuela de Comerciu.

_{Carla Simón, Premio Comadre de Cine 2024}

L’actriz Assumpta Serna y l’actor Scott Cleverdon presentarán los sos llibros Monólogos para protagonistas/Take the Lead vol.1 y vol.2; yCelsa Alonso, caderalga de Musicoloxía, xunto a Laura Miranda, profesora de Musicoloxía y editora del llibru The Routledge Handbook to Spanish Film Music, conversarán sobre

esti proyeutu d’investigación de la Universidá d’Uviéu sobre la hestoria de la música nel cine español.

El Festival ufiertará una riestra de meses redondes de gran interés colos siguientes títulos: Nos toca a todas. Violencia contra la mujer en la industria audiovisual, en collaboración con CIMA y Institutu de la Muyer; Documentar la realidad, en collaboración cola Tertulia Les Comadres; Los secretos de la música de cineorganizada pola asociación Musimagen; Conciencia2 por el clima “Qué tiempo va a hacer mañana: efectos visibles en el clima”, un proyeutu impulsáu pola Cátedra de Cambiu Climáticu de la Universidá d’Uviéu en collaboración cola plataforma The Conversation; El futuro de la Filmoteca de Asturias a debate, onde se falará de la futura creación d’esti emblemáticu espaciu; y Un rodaje insólito, que descubrirá los secretos de la película de Antonio R. Cabal Sáhara fin de viaje.

Varies proyeiciones tendrán llugar dientro del programa d’Actividaes complementaries del FICX. El direutor asturianu Marcos Merino va presentar 25 aniversario del Museo del Ferrocarril de Asturias en collaboración cola Fundación Municipal de Cultura; el realizador Batiste Miguel y l’actor Alejandro Palomas van presenter Vínculo, la llamada del pingüino; No estás sola d’Almudena Carracedo y Robert Bahar proyectaráse en collaboración con CIMA: ¿Dónde vamos a vivir? Mujeres contra el desahucio de Georgina Cisquella podrá vese en collaboración cola Tertulia Feminista Les Comadres; y l’alumnáu del CISLAN presentará la so session Estamos de cine na que se proyeutará una esbilla de los sos trabayos.

L’anunciáu conciertu Top Secret del quintetu de metal Spanish Brass ufiertará’l domingu 17 de payares nel Teatru de la Llaboral un inmersivu viaxe peles bandes sonores de los clásicos d’espíes en collaboración cola Sociedá Filarmónica de Xixón. Previamente al conciertu, el sábadu 16 de payares, nel salon d’actos del Centru de Cultura Antiguu Institutu (CCAI) tendrá llugar la conferencia Top Secret: la música en el cine de espías, impartida pola doctora Mar Norlander, musicóloga y vicepresidenta de la Sociedá Filarmónica de Xixón.

A esta ufierta súmase la presentación de la primer edición del Altafulla International Film Festival (AIFF), xunto cola proyeición de TBO BERDE, una recopilación qu’axunta diez hestories nun volume namás; la Tertulia Three Amigos, xunto a los críticos cinematográficos Alejandro G. Calvo, Daniel de Partearroyo y Alberto Lechuga; Me gustó más el libro, con Azucena Rodríguez, direutora de la película Atlas de Geografía Humana y una charra especial sobre Lady Hithcock: La compañera olvidada, onde se-y dará valir a la figura d’Alma Reville, una de les muyeres más influyentes na hestoria del cine.

Talleres, charres y alcuentros de cineastes col públicu y la prensa tendrán tamién llugar nes estremaes sedes venceyaes al FICX como l’Antigua Escuela de Comerciu, el Centru de Cultura Antiguu Institutu (CCAI) o’l Café-Llibrería Toma 3.

El FICX súmase a la promoción del talentu español incluyendo na so inauguración el curtiumetraxe La causa del accidente que provocó el incendio (España) dirixíu por Lope Serrano pa la productora CANADA. Sobre esta obra articúlase la campaña d’Audiovisual from Spain (ICEX) que lleva por nome «Spain, Where Talent Ignites» y que tien como oxetivu potenciar la visibilidá de la calidá audiovisual española nel esterior en toles sos vertientes. El curtiumetraxe cunta con un elencu de luxu compuestu por Bárbara Lennie, Berta Prieto y Omar Ayuso, y inclúi los cameos de los directores Albert Serra y J.A. Bayona.

_{La causa del accidente que provocó el incendio de Lope Serrano}

La pieza va dar pasu a ¡Gloria! (Italia), llargumetraxe musical estrenáu na Berlinale nel que l’actriz y cantautora italiana Margherita Vicario debuta como directora y reivindica la memoria de les muyeres compositores a lo llargo de la hestoria. Failo nel contestu de Venecia nel entamu del sieglu XIX, onde una criada moza del orfanatu y conservatoriu de San Ignacio va llevar alantre  un descubrimientu que va suponer una gran revolución vital y artística. El Festival va proyectar la película inaugural, que foi mercada por Surtsey Films pa la so distribución n’España, en collaboración cola Dirección Xeneral d’Igualdá de Muyeres y Homes del Conceyu de Xixón.

_{¡Gloria! de Margherita Vicario}

Pela so parte, Silent Trilogy (Finlandia) de Juho Kuosmanen va ser el film de clausura d’esta 62ª edición. Son tres hestories interconectaes nes que’l so director (galardonáu en Cannes, Locarno, Tampere y nos Premios del Cine Européu, y autor de la célebre Compartimiento nº 6, nominada a un Globu d’Oru) retoma’l camín del so compatriota y amigu Aki Kaurismäki pa rindir homenaxe al cine mudu, amás convida a repensar la nuesa rellación cola imaxe más allá de la palabra. Estrenada nel célebre y fundamental Cinema Ritrovato de Bolonia, Silent Trilogy supón un auténticu festín cinéfilu pa cerrar el 62 FICX.

_{Silent Trilogy de Juho Kuosmanen}

El FICX ufierta nesta sección, qu’en 2024 pasa a tener el so propiu apartáu fuera d’Esbilla, una mimada escoyeta na que los xéneros clásicos son abordaos dende óptiques artístiques úniques y xabazmente heterodoxes.

Cuatro llargumetraxes van tener la so estrena estatal en Xeneración Mutante: Laguna Mental de Cristóbal Arteaga (estrenu internacional), Real d’Adele Tulli, Paying For It de Sook-Yin Lee y Boreal de Pelayo Muñiz Cabal (estrenu mundial).

Laguna mental (Chile, España) ye la última película de Cristóbal Arteaga, cineasta chilenu afincáu en Madrid que pasó pel FICX en 2019 con As mortes. Tres pasar per SanFic, el direutor presenta agora nel FICX l’estrenu internacional d’esta comedia de risa meta-cinematográfica, na qu’un actor dientro d’un traxe de croma debala per un pueblu de Chile tratando d’alcontrar al restu del equipu de rodaxe.

_{Laguna mental de Cristóbal Arteaga}

La cineasta italiana Adele Tulli reflexona en Real (Italia, Francia), película estrenada mundialmente en Locarno, sobre la esperiencia humana na dómina dixital, onde la distinción ente lo real y lo virtual ye cada vez más fráxil. Failo al traviés d’una multiplicidá d’imáxenes de natures heteroxénees, que van dende les rexistraes con cámares de vixilancia hasta les xeneraes con Intelixencia Artificial.

_{Real de Adele Tulli}

Con Paying For It (Canadá) la realizadora Sook-Yin Lee firma, dende una perspectiva feminista y autobiográfica, una adaptación de la obra gráfica homónima de Chester Brown. Na película, estrenada en Toronto y que cunta cola producción executiva de John Cameron Mitchell (Hedwig and the Angry Inch), un dibuxante empieza a recurrir a la prostitución cuando la so moza decide redefinir la so rellación.

_{Paying For It de Sook-Yin Lee}

Boreal (España) ye la ópera prima del director xixonés Pelayo Muñiz Cabal, que ganó en 2005 el premiu Nuevos Realizadores del FICX col so proyectu de curtiu Sístole/Diástole. Nel filme, que va tener el so estrenu mundial nel FICX, cuatro amigos axúntense nuna casa rural onde l’ambiente se enrarez per momentos.

Representante del nuevu cine francés queer con doble reconocencia nel Festival de Locarno pol so curtiumetraxe Les démons de Dorothy, Alexis Langlois debuta nel llargu con Las reinas del drama (Francia, Bélxica). Nél, céntrase na rellación d’amor lésbicu ente dos cantantes opuestes que se conocen nun concursu televisivu. La cinta, que cunta con Asia Argento y Alma Jodorowsky nel repartu, llega a Xixón tres el so pasu pela Selmana de la Crítica de Cannes y el Festival Atlántida de Mallorca y preséntase en collaboración con XEGA (Asociación de persones LGTBI+ d’Asturies).

La Parra (España) ye’l tercer llargumetraxe del cineasta gallegu Alberto Gracia, ganador del Premiu FIPRESCI nel Festival de Róterdam 2013 cola so ópera prima, El quinto evangelio de Gaspar Hauser. Nesta ocasión, el director cunta la hestoria d’un home al que confunden, tres volver al so Ferrol natal, con un guía desapaecíu. La película, premiada na SEMINCI, estrenóse mundialmente en Róterdam y cuenta con fotografía d’Ion de Sosa y música de Jonay Armes.

La directora irlandesa Aislinn Clarke firma col so segundu trabayu la primer película de terror en gaélicu. Fréwaka (Irlanda) ye una esmolecedora hestoria d’horror folk na qu’una muyer se tresllada a un pueblu aislláu pa curiar d’otra. La cinta llega a la Xeneración Mutante del FICX tres presentase fuera de concursu nel Festival de Locarno y na Sección Oficial en Sitges, onde llogró’l Premiu a la Meyor Banda Sonora.

Tres curtiumetraxes van tener tamién cabida na Sección Xeneración Mutante del FICX: la premiere internacional de Stairs (Luxemburgu) de la cineasta Raha Raz Ghashghai, na qu’una direutora enfréntase al so primer día de rodaxe; l’estrenu n’España de La noche del Minotauro (Colombia) de Juliana Zuluaga Montoya, qu’ufierta un rellatu fantásticu construyíu con imáxenes d’archivu; y Planetagatik (España) d’Eneko Muruzabal Elezcano, nel qu’un científicu cuestiona les polítiques medioambientales tomaes pola so empresa.

La sección Xeneración Mutante va acoyer, amás, el Pase Especial 14^u Aniversariu del llargumetraxe Campamento Flipy (España), la comedia (convertida yá en cult movie) de Rafa Parbus rodada n’Asturies y protagonizada por Flipy, Carlos Areces, Eloi Yebra, Pablo Carbonell, Marta Belmonte, Ernesto Sevilla, Raúl Cimas, Ignatius Farray, Rosario Pardo y Pedro Reyes. Y el Festival va acoyer amás la proyección especial d’El ataque de los muertos sin ojos (España), película escrita y dirixida pol maestru del cine de terror Amando de Ossorio en 1973, con Tony Kendall, Fernando Sancho, Esperanza Roy, Frank Braña y Lone Fleming como protagonistes.

El FICX desvela la programación del apartáu internacional Esbilla y d’Esbilla –Equí n’otru tiempu, espaciu dedicáu a la non ficción, qu’incluye dellos estrenos n’España y a nivel mundial asina como una bayurosa representación del cine asturianu.

Misericordia (Francia, España, Portugal), Meyor Película na recién acabante Seminci y candidata a los Premios de l’Academia Europea, ye l’últimu trabayu del prestixosu cineasta francés Alain Guiraudie, autor d’El desconocido del lago. El filme, coproducíu pola compañía Andergraun Films, ye un thriller rural teñíu d’afiláu sentíu del humor. Alain Guiraudie repite nel certame xixonés tres visitalu en 2009 con El rey de la evasión.

_{Misericordia de Alain Guiraudie}

Hong Sang-soo repite doblete nel FICX (con By the Stream en Seición Oficial) y vuelve a trabayar cola icónica Isabelle Huppert en Necesidades de una viajera (Rep. de Corea), ganadora del Osu de Plata en Berlín. Nesta ocasión, el realizador filma con dilixencia a l’actriz nel papel d’una viaxera que da clases de francés en Corea del Sur.

La luz que imaginamos (Francia, India, Países Baxos, Luxemburgo) ye la nueva y rellumante película de la direutora india Payal Kapadia, ganadora del Gran Premiu del Xuráu en Cannes y del Premiu Otra mirada nel Festival de San Sebastián. La cineasta avérase con una sensibilidá esceicional a l’amistá ente dos muyeres de Mumbai.

Nel contestu d’un país en continua tresformación socioeconómica como China, Caught by the Tides (China) del maestru Jia Zhang-Ke fainos partícipes d’una hestoria d’amor que dura venti años. El filme, qu’axunta lo meyor del cine del so realizador, tuvo’l so estrenu na Seición Oficial de Cannes.

Tamién programada na Seición Enfants Terribles, Salvajes (Suiza, Francia, Bélxica) deClaude Barras presenta una fábula ecoloxista n’animación stop-motion que reflexona sobre les consecuencies de la deforestación. La cinta foi seleccionada nos festivales d’Annecy y de Sitges y ye candidata a los Premios del Cine Europeu.

La oscarizada y tres veces ganadora en Cannes Andrea Arnold firma en Bird (Reinu Xuníu) un drama con tintes de realismu máxicu sobre una preadolescente que vive con so padre y el so hermanu nuna casa ocupada. Protagonizada por

Barry Keoghan, Franz Rogowski y la debutante Nykiya Adams, ye candidata a los Premios del Cine Européu.

La realizadora danesa Lone Scherfig, reconocida pola so afalagada y nominada al Óscar One Day, presenta La contadora de películas (España, Francia, Chile). El filme tien como contestu’l desiertu d’Atacama nos años 60, onde una muyer se convierte na cuntadora d’hestorias d’un pueblu nel que la mayoría de los sos habitantes nun pueden pagar por dir al cine. Con Bérenice Bejo, Daniel Brühl y Antonio de la Torre, y nominada a tres premios Goya. Proyección en collaboración cola Tertulia Feminista Les Comadres.

Escoyíu pa representar a Italia nos Oscars y sensación dafechu en Venecia, onde sumó tres premios (Especial del Xuráu, Meyor Película Italiana, Meyor Actriz Revelación), el segundu llargumetraxe de la italiana Maura Delpero, Vermiglio (Italia, Francia, Bélxica), ye un emocionante drama d’época ambientáu a finales de la Segunda Guerra Mundial. El filme toma’l so títulu del pueblu de los Alpes italianos onde habita la familia protagonista, que ve la so rutina alteriada cola llegada d’un desertor. La proyeición de la película nel contestu del 62 FICX afita la collaboración del festival dientro de les actividaes del European Arthouse Cinema Day promovíu por CICAE, la Confederación Internacional de Cines d’Arte y Ensayu.

_{Vermiglio de Maura Delpero}

The Antique (Xeorxa, Suiza, Finlandia, Alemaña), película que representa a Xeorxa na carrera pol Oscar, ye otru segundu llargumetraxe, nesti casu de la direutora xeorxana Rusudan Glurjidze, que, inspirándose na deportación illegal de milenta xeorxanos pol gobiernu rusu en 2006 realiza un rellumante drama de crítica social. La direutora algamó cola so ópera prima House of Others el Gran Premiu de Karlovy Vary y fo candidata al Óscar a la Meyor Película Estranxera en 2017.

_{The Antique de Rusudan Glurjidze}

La programación d’Esbilla cuntará tamién col curtiumetraxe Ojitos mentirosos (España) d’Elena Duque, direutora astur-venezolana qu’en 2020 algamó una  Mención Especial del Xuráu nel FICX con Colección privada. Nel so últimu trabayu ufierta una interesante y lúdica reflexón sobre l’arte del cine como “trampantojo”

Amás, la cineasta Maria Royo, que l’añu pasáu participó nel FICX con On the Go, algamando ente otros el Premiu al Meyor Llargumetraxe Español, presentará la esquisita esbilla de curtimetraxes CATALYST SHORTS que, desendolcaos baxo’l paragües del Institutu de Creación Artística y Teunolóxica de Berlín, podrán esfrutase nuna proyeición especial dientro d’Esbilla.

Esbilla – Equí y n’otru tiempu: cara a cara colos desafíos de la non ficción.

La Seición Esbilla Equí y n’otru tiempu compón un interesante abanicu de pieces que trensiten suxerentes territorios dientro de la non ficción y cunta con una xenerosa presencia de cine asturianu, con hasta ocho títulos (co)producíos n’Asturies y/o (co)dirixíos por cineastes de la nuesa rexón. Esti añu incluye l’estrenu estatal de cuatro atractivos títulos (As the Tide Comes In de Juan Palacios & Sofie Husum, Pol Pot Dancing d’Enrique Sánchez Lansch, Los capítulos perdidos de Lorena Alvarado y The Flats de Alessandra Celesia); y l’estrenu mundial de tres llargumetraxes (Sumario 3/94 d’Abel García Roure, Armamento musical de José Riveiro y Planta – 1 de Konchi Rodríguez).

Estrenada en Tesalónica, película inaugural en Visions du Réel, As the Tide Comes In (Dinamarca) de Juan Palacios & Sofie Husum Johannesen avérase, con una mirada observacional y humanista que perpasa la pantalla, al últimu agricultor d’una pequeña islla danesa de 8 kilómetros cuadraos amenazada pol cambiu climáticu. Juan Palacios torna al FICX tres el so pasu pola edición 57 del certame xixonés con Meseta.

_{As the Tide Comes In de Juan Palacios & Sofie Husum Johannesen}

Abel García Roure, cineasta y ayudante de direición de José Luis Guerin, Mercedes Álvarez o Isaki Lacuesta, llogra con Sumario 3/94 (España) detonar la teórica oxetividá d’un relatu xudicial al cuntar la hestoria d’un home acusáu de matar a la so vecina. La película adapta la novela homónica de María Salgado, Jaron Rowan, Raquel Taranilla y Kenneth Goldsmith, construyida a partir de los testos del sumariu d’un casu real.

La realizadora venezolana Lorena Alvarado presenta cola so ópera prima Los capítulos perdidos (Venezuela) una guapa hestoria onde una moza encárase, al tornar pa Caracas trés años nel estranxeru, con cambeos como los qu’implica la perda de memoria de so güela. La cinta foi seleicionada nos certámenes de Marsella, Munich y Locarno y premiada nel Festival Internacional de Monterrey.

_{Los capítulos perdidos de Lorena Alvarado}

The Flats (Francia, Bélxica, Irlanda, Reinu Xuníu)d’Alessandra Celesia pon el focu nun barriu de Belfast p’abordar los estragos del violentu conflictu ente católicos y protestantes. El filme, qu’ufierta un necesariu análisis pa mirar pal futuru, algamó’l Premiu al Meyor Llargumetraxe nel Festival Internacional de Documental d’Irlanda.

_{The Flats de Alessandra Celesia}

En Que se sepa (Indarkeriaren oi(h)artzunak) (España), Amaia Merino y Ander Iriarte acompañen a Tamara Muruetagoiena, quien espón con detalle l’impuestu revolucionariu, el secuestru por parte d’ETA, l’acosu del Estáu y la presión política, la detención de so pá y so ma, les tortures, l’asesinatu… Una mirada serena al conflictu vascu premiada nel Festival de Cine y Derechos Humanos de San Sebastián.

En Territory, el direutor de Salvajes e Il Mulín,l’avilesín Álex Galán,adéntrase nel iviernu de la estepa d’Asia Central p’acompañar al actor serbiu Darko Peric (conocíu por La casa de papel), nun camín de redención pelos altos montes de Kirguistán. El filme, con percorríu per festivales como Moscú, Torino o l’Atlántida de Mallorca, cunta amás con una impresionante fotografía de la mano del tamién avilesín David Rodríguez Muñiz y con banda sonora de Delaporte.

_{Territory de Álex Galán}

El direutor hispano-alemán orixinariu de Xixón Enrique Sánchez Lansch cunta en Pol Pot Dancing (Alemaña, Noruega) la hestoria d’una baillarina de danza Khmer, una disciplina tradicional que cola revolución de Pol Pot pasó a ser persiguida hasta’l puntu de cuasi desaniciar dafechu a la totalidá de la xente que se dedicaba a ella y la so enseñanza. Lanscch valse d’imáxenes, tanto d’archivu como más nueves, pa facer un perinteresante análisis hestóricu sobre la identidá d’un territoriu marcáu pol xenocidiu.

_{Pol Pot Dancing de Enrique Sánchez Lansch}

El cineasta asturianu Omar Tuero, qu’amuesa un enfoque cinematográficu al rodiu l’alcordanza hestórica y la identidá cultural, desvela en L’Escaezu de les Piedres la hestoria de los campos de concentración franquistes n’Asturies, centrándose nel d’As Figueiras-Arnao, l’únicu namás empobináu pa muyeres y neños.

En La revolución de las musas (España), Mar Nantas, Juno Álvarez y Yaiza de Lamo esploren el papel de les muses na Hestoria del Arte Occidental resaltando’l so estrechu venceyu cola obra de los denomaos grandes xenios como co-creadores. Les direutores vuelven al FICX, onde estrenaron en 2019 el curtiumetraxe DIYSEX, nel que reflexonaben sobre la utilización de la imaxe y el llinguaxe na pornografía.

_{La revolución de las musas de Mar Nantas, Juno Álvarez y Yaiza de Lamo}

Daniel Lovi presenta con Engarradiella una película que fai una crítica de los ataques al coleutivu LGTBIQ+ dientro de la música y especialmente nel punk. Nel  llargumetraxe, fechu por mor de la producción del discu homónimu, revisítense y versiónense clásicos de la escena punk con lletres que menten a la llucha del coleutivu.

Manuel García Postigo cunta en Montiana. Entre hórreos y chimeneas la hestoria d’esti pobláu asturianu surdíu pa dar agospiu a los trabayadores de la gran empresa siderúrxica llocal, que dio llugar a una fuerte agrupación vecinal.

La directora Konchi Rodríguez vuelve componer un filme xunto al so alumnáu. Si en 2019 destacó col falsu documental Robertina Turón,  nesta ocasión realiza xunto a los estudiantes del IES Doña Jimena, Planta -1. Mentanto investiga la contracultura nos años 60 en EE.XX., el llargumetraxe supón un significativu viaxe d’autoconocimientu pal alumnáu.

N’Armamento musical, José Riveiro analiza’l conflictu bélicu dende un novedosu puntu de vista: el del poder armamentísticu de la música. El cineasta algamó’l Premiu al Meyor Llargometraxe Asturianu del FICX en 2015 con La base del éxito.

“El cine cara a cara”. Asina ye como’l Festival Internacional de Cine de Xixón va convertise, del 15 al 23 de payares, nun espaciu d’alcuentru ideal ente públicu y cineastes nel que la ciudá algamará, tamién, la so dimensión protagonista.

Nesta 62ª eidción, el FICX va proyeutar 75 (co)producciones españoles, lo qu’afita’l so compromisu col cine del nuesu país. Amás de desvelar 6 títulos de producción estatal dientro de la so Seición Oficial de Curtiumetraxes, el Festival da anuncia yá a la totalidá de títulos que completen les dos sos principales seiciones competitives: Albar y Retueyos.

Ado Arrieta y Celia Rico Clavellino protagonizarán los Focos del 62 FICX xunto a la yá anunciada Gala Hernández López

Llibre, inusual, atrevíu. L’icónicu direutor precursos del cine independiente, Ado Arrieta, sedrá’l protagonista d’ún de los Focos del FICX. Tres desendolcar parte de la so filmografía n’España, el cineasta y pintor madrilano mudóse a París, onde vivió la revolución de mayu del 68 y conoció a personalidaes como Marguerite Duras o Jean Marais (actor habitual de Jean Cocteau, cineasta de referencia na obra d’Arrieta).

Na so filmografía cunta con producciones españoles y franceses, toes elles travesaes per una reconocible guapura plástica y poética y por una marcada intención lúdica. Les películes d’Arrieta foron afalagaes por artistes del altor de la mesma Duras o’l siempre recordáu Jonas Mekas.

El Festival va proyeutar seis de les obres más representatives del direutor, escoyíes pol propiu cineasta, ente les que s’atopen los curtiumetraxes La imitación del ángel (1966) y Vacanza permanente (2006); el mediumetraxe Tam Tam (1976); y tres llargumetraxes: Las intrigas de Sylvia Couski (1975), considerada como la primer película underground parisina; Flammes (1978) y Bella durmiente (2016), una particular adaptación del clásicu pa la que cunta coles rellumantes interpretaciones de Mathieu Amalric y Niels Schneider.

_{Ado Arrieta}

Celia Rico Clavellino tamién va ser protagonista d’ún de los Focos del 62 FICX. La direutora sevillana, qu’entamó nel oficiu xunto a cineastes de renome como Pablo Berger o Jose Luís Guerín, firmo en 2012 el so curtiumetraxe Luisa no está en casa (2012), con presencia en Venecia y nel Festival de Málaga y ganador d’un Premiu Gaudí. Participa depués nel guión de Quatretondeta, película de Pol Rodríguez qu’algamó delles nominaciones a los Premios Goya en 2017. Con Viaje al cuarto de una madre (2018), protagonizada por Lola Dueñas y Anna Castillo, presenta la so ópera prima algamando una Mención Especial nel Festival de San Sebastián, el Premiu Asecan a la Meyor Película, dos nominaciones a los Premios Feroz y una nominación al Goya a la Meyor Dirección Novel. Col so segundu llargumetraxe, Los pequeños amores (2024), vuelve a centrar la so narrativa nos venceyos materno-filiales xunto a les actrices María Vázquez y Adriana Ozores, y obtuvo’l Premiu Especial del Xuráu en Málaga, asina como otros dos galardones en San Sebastián y Toulouse.

_{Celia Rico Clavellino}

A los focos d’Ado Arrieta y Celia Rico Clavellino amiéstase’l yá anunciáu a l’artista multidisplinar ya investigadora murciana Gala Hernández López.

La Seición Oficial Albar descubre la so fascinante programación al completo

Seis nuevos títulos completen la Seición Oficial Albar xunto a les películes previamente anunciaes: L’Empire de Bruno Dumont; Good One d’India Donaldson; Eight Postcards From Utopia de Radu Jude & Christian Ferencz-Flatz; Retaguardia de Ramón Lluís Bande; La prisonnière de Bordeaux dePatricia Mazuy; Vulcanizadora de Joel Potrykus, Tú me abrasas de Matías Piñeiro y Dying de Matthias Glasner.

Le roman de Jim (Francia)ye l’últimu llargumetraxe de los hermanos Arnaud Larrieu & Jean-Marie Larrieu. Un emocionante retratu de la paternidá que llega a la Seición Oficial Albar tres el so estrenu en Cannes Premiere. Los direutores franceses, que compitieron pola Palma d’Oru en Cannes con  Pintar o hacer el amor en2005, clausuraron la edición del FICX en 2021 cola so película Tralala. Los sos trabayos foron seleccionaos en Festivales como Locarno, San Sebastián, Londres o Rotterdam.

_{Le roman de Jim de Arnaud Larrieu & Jean-Marie Larrieu}

Espertu en retratar les incógnites de la naturaleza humana, el productivu direutor surcoreanu Hong Sang-soo, yá un clásicu na programación del Festival, presenta By the Stream (Rep. de Corea). El doblemente ganador de la Seición Oficial del FICX convida a reflexonar cola so última obra sobre la creación. Y failo per aciu d’una artista y profesora universitaria a la que da vida Kim Minhee, merecedora del Lleopardu a la Meyor Actriz nel Festival de Locarno.

_{By the Stream de Hong Sang-soo}

El direutor suecu Gustav Möller presenta en Condenados (Dinamarca, Suecia) un inquietante thriller psicolóxicu que pon en peligru’l sentíu de la xusticia de la celadora d’una cárcel, interpretada de mou brillante pola multipremiada actriz

Sidse Babett Knudsen. El filme llega al Festival tres el so pasu pela Seición Oficial de Berlín.  

Ray Yeung ufierta con All Shall Be Well (Hong Kong)una mirada distinta sobre l’amor ente dos muyeres d’avanzada edá nun entornu onde ye importante mirar poles apariencies. La temática LGTBI sal davezu na obra del cineasta hongkonés, que tuvo yá percorríu en certámenes internacionales como Berlinale, onde obtuvo’l Premiu Teddy col so nuevu trabayu.

Los malditos (Italia, Estados Xuníos, Bélxica) ye una revisión de la Guerra Civil estadounidense dende’l prisma de Roberto Minervini. El direutor italianu firma por primervez un llargumetraxe dafechamente de ficción y con ecos de post-western dempués de facer, con una visión mui personal, obres de non-ficción como The Other Side (Louisiana) o Stop the Pounding Heart, onde retrató l’América más fonda. Los malditos llega a la Seición Oficial del FICX tres recibir el Premiu a la Meyor Direición Un Certain Regard en Cannes.

El meyor representante de la comedia romántica-dramática francesa, el realizador Emmanuel Mouret, vuelve a participar na Seición Oficial Albar con Trois amies (Francia). El FICX cuntó col so llargumetraxe Las cosas que decimos, las cosas que hacemos en 2020 y cola presencia del cineasta na 60ª edición con Crónica de un amor efímero. Nesta ocasión, Mouret narra la hestoria d’una muyer que tien que refacer la so vida tres perder al so maríu. El filme, que tuvo’l so estrenu na Seición Oficial del Festival de Venecia, cunta coles magnífiques interpretaciones de Camille Cottin, Sara Forestier, India Hair y el siempre impecable Vincent Macaigne.

_{Trois amies de Emmanuel Mouret}

Nuevos talentos del cine súmense a la Seición Oficial Retueyos

A January 2 de Zsófia Szilágyi; Flathead de Jaydon Martin; Algo viejo, algo nuevo, algo prestado d’Hernán Rosselli; Peaches Goes Bananas de Marie Losier; Fogo do vento de Marta Mateus; y Mother Vera de Cécile Embleton y Alys Tomlinson, súmense siete títulos de prometedores cineastes que componen una inmeyorable ufierta de programación na Seición Oficial Retueyos.

Itoiz udako sesioak (España) de Larraitz Zuazo, Zuri Goikoetxea y Ainhoa Andraka,revive la hestoria de la banda de rock progresivu/sinfónicu vasca Itoiz, que tres gociar de reconocimientu nos años 80, acabó por desaniciase a finales d’esa década. El llargumetraxe formó parte d’un programa especial dientro de Cannes Doc, que se desendolcó en collaboración col FICX y ZINEBI y preséntase en Xixón a mou de premiere conxunta en collaboración col certame vascu.

El FICX cuntará col estrenu mundial de River Returns (Xapón).Trátase del tercer llargumetraxe de Masakazu Kaneko, direutor qu’asitia nel centru de les sos hestories el venceyu del ser humanu cola naturaleza y que filma con una delicadeza esceicional. La película remite al universu animáu de los Studios Ghibli en versión real.

_{River Returns de Masakazu Kaneko}

El Festival va acoyer amás l’estrenu mundial de Luna.El direutor asturianu Pablo Casanueva desendolca nel so segundu llargumetraxe, un procesu d’investigación nes alcordances de la so familia, que foi cuasi desaniciada na Guerra Civil y el franquismu atopando la so historia “nes llendes, los campos y les cárceles”.

Yo vi tres luces negras (Colombia, México, Alemaña, Francia)ye’l segundu llargumetraxe de Santiago Lozano Álvarez. Nél, adiéntrase na selva colombiana p’acompañar nun ritu de pasu p’hacia la muerte a un home mayor que perdió al fíu a manos de la milicia paramilitar. A la guapura del espaciu y la escoyeta de los encuadres, súmase la espectacular fotografía de Juan Velásquez. La película algamó’l Premiu del Públicu na Seición Panorama de la Berlinale.

Sacha Amaral debuta con El placer es mío (Arxentina, Brasil, Francia), una ópera prima protagonizada por un magnéticu y problemáticu mozu que llogra aprovechase de cualquiera que se crucie nel so camín. La película, qu’obtuvo’l Gran Premiu nel Festival Internacional de Buenos Aires (BAFICI), tendrá la s premiere europea nel FICX.

La direutora Elizabeth Lo, que ganó con Stray el Premiu a la Meyor Película na Seición Retueyos en 2020, vuelve a competir nesta edición del FICX con Mistress Dispeller (China, EEUU). Nella, la cineasta ufierta una mirada a la China actual per aciu d’una nueva profesión que surde col puxu d’internet: La ahuyentadora de amantes

Fuera de competición, el Festival proyectará’l mediumetraxe What Mary Didn’t Know (Grecia, Francia, Suecia), que tuvo’l so estrenu nel certame de Locarno y dirixida por Konstantina Kotzamani, dos veces nominada a los Premios del Cine Européu colos sos anteriores curtiumetraxes y que presentó Electric Swan  nel FICX en 2019. Nesta ocasión, la cineasta griega llévanos de cruceru pel Mediterraneu nun medley fabulosu ente Les Mil y Una Nueches y la mitoloxía clásica, y failo dende la perspeutiva d’una moza perdida a bordo nesti viaxe per aciu de la mar, la vida y los suaños.

_{What Mary Didn’t Know de Konstantina Kotzamani,}

El FICX completa la so Seición Oficial de Curtiumetraxes con seis obres de producción española

Seis escepcionales títulos súmense na Seición Oficial de Curtimetraxes a los yá aunciaos Revolving Rounds de Johann Lurf & Christina Jauernik; Being John Smith de John Smith; Sheep Out de Zofia Klamka; Todos los futuros de Bárbara Cerro; Freeride in C d’Edmunds Jansons; Better This Way d’Emanuel Pârvu; y Closeout d’Agnė Girsaitė.

Tres de las nuevas propuestas surgen de la renovada colaboración del FICX con el Festival Internacional de Cine Documental y Cortometraje de Bilbao (ZINEBI). Este año ambos certámenes comparten, además de un largometraje, los estrenos de los cortometrajes Errotatiba de Iratxe Fresneda; Horizontal de Alex Reynolds y Campolivar de Alicia Moncholí.

L’artista y realizadora Alex Reynolds firma Horizontal,un atmosféricu curtiumetraxe nel qu’una neña asume’l papel d’adulta. La obra de Reynolds amosóse en prestixosos museos d’arte contemporaneu y festivales como’l BFI London Film Festival, FIDMarseille o Documenta Madrid.

La direutora ya investigadora bilbaína Iratxe Fresneda, que pasó pel FICX con Lurralde Hotzak (2018) y Tetuán (2022), presenta n’Errotatiba una reflexón sobre l’alcordanza per aciu les imáxenes de les rotatives y oficines d’una vieya redaición, la del diariu vascu Egin.

La cineasta asturiana Alicia Moncholí presenta col curtiumetraxe Campolivar un valiente análisis del recuerdu que tien de so pá per aciu d’incandescente material d’archivu familiar. La cineasta algamó con ella, na so fase de proyeutu, el Premiu Nuevos Realizadores del Principáu d’Asturies en 2021.

_{Campolivar de Alicia Moncholí}

El tamién asturian y ganador del Premiu Nuevos Realizadores del FICX en 2023, Diego Flórez, ofrez  n’Una lluz unarevisión d’espacios hestóricos rellacionaos cola minería na Cuenca Asturiana.

_{Una lluz de Diego Flórez}

Maider Fernández Iriarte, direutora que visitó’l FICX en 2019 con Las letras de Jordi y en 2022 con Fe, presenta agora Una trabaja, la otra no. Con un títulu qu’homenaxea a la película de la tamién recordada Agnès Varda, Una canta, la otra no, la realizadora donostiarra amuesa, chiscáu pol humor sarcásticu, el día a día na convivencia de dos muyeres que trabayen nel sector audiovisual.

El FICX tamién cuntará na so Seición Oficial de Curtiumetraxe con El mal d’Hèrcules, un trabayu observacional sobre’l tratamientu de la epilepsia nun hospital de Barcelona que surde como proyeutu del Máster de Documental de la Universidá Autònoma de Barcelona-UAB (coordináu pol cineasta Jorge Tur) y firmáu por Marta Rodríguez Quesada, Marina Miguel Pavia, Paula García Escolá, Laia Balaguer, Ismael Cabrera y Eulàlia Clarós Sidera.

La Nueche del Curtiu Español alluma con lluz propia nel 62 FICX

La Nueche del Curtiu Español ye, dende va años, una de les más valoraes pol públicu del Festival. Nesta ocasión, cuatro direutores y dos direutores firmen los títulos que componen el so atrautivu programa.

Carmen Jiménez avérase a les mancadures de la infancia que s’arrastren na vida adulta en Lava. El curtiumetraxe, candidatu a los Premios Goya, tuvo presencia nes seiciones oficiales de los certámenes de Málaga y Sevilla. La direutora ye  conocida como co-guionista d’Adiós de Paco Cabezas y de la serie La Mesías de Javier Calvo y Javier Ambrossi.

La cineasta catalana Cordelia Alegre presenta n’El norte a una güela y una nieta que nun son a atopar el camín de vuelta pa casa por un episodiu de desorientación de la primera. Un conmovedor curtiumetraxe construyíu al rodiu de les preguntes de la so direutora sobre los cuidaos ente xeneraciones.

María Abenia firma Las sirenas: un curtiumetraxe sobre la feminidá, la sororidá y l’alcordancia al rodiu’l papel de la muyer nel ámbitu rural canariu. La cineasta repite nel FICX tres presentar presentar Circe en 2022 y Sísifo na pasada edición.

_{Las sirenas de María Abenia}

Judoka ye un curtiumetraxe d’Ander Iriarte con guion d’Estibaliz Urresola (direutora de 20.000 especies de abejas). Nél, la cámara revélase como los güeyos d’un personaxe qu’habita un estáu d’ansiedá constante y que s’encara a problemes d’esclusión social. Ander Iriarte ye tamién codirector xunto a Amaia Merino de Que se sepa (Indarkeriaren oi(h)artzunak), llargumetraxe que formará parte de la Seición Esbilla – Equí y n’otru tiempu del FICX. 

_{Judoka de Ander Iriarte}

Las chicas de Laura Obradors ye un coming-of-age fantásticu protagonizáu por unes moces que s’enfrenten xuntes a los conflictos propios de la edá ente los que destaca la cuestión de xéneru.

En Kokuhaku, d’Adrià Guxens,un actor xaponés conocíu por interpretar a personaxes femeninos revive’l so pasáu nuna entrevista. El curtiumetraxe llega, tres el so pasu pel Festival de Sitges, a la Nueche del Curtiu Español.

_{Kokuhaku de Adrià Guxens}

Del 15 al 23 de payares, el Festival Internacional de Cine de Xixón volverá apostar pol cine de calidá, arriesgáu y anovador. Pa ello va cuntar cola obra de cineastes de reconocida trayectoria del altor de Patricia Mazuy o Matías Piñeiro, y tamién con nomes de directores emerxentes que tán dando y van dar que falar como Zsófia Szilágyi o Jaydon Martin

Delles de les miraes más interesantes del cine contemporaneu internacional van formar parte de la Sección Oficial Albar

La cineasta francesa Patricia Mazuy, a quien el Festival dedicó un focu na so 60ª edición, vuelve cuntar cola estraordinaria Isabelle Huppert p’actuar en La prisonnière de Bordeaux (Francia). Huppert y Hafsia Herzi dan vida a dos muyeres de clases sociales enfrentaes que desarrollen un fuerte venceyu tres coincidir nes visites a la cárcel de los sos respectivos homes. La directora de Peaux de vaches, con una obra caracterizada pola so elegancia y por cierta crudeza fonda, va estrenar el so últimu trabayu n’España na Sección Oficial Albar del 62 FICX.

_{La prisonnière de Bordeaux de Patricia Mazuy}

Vulcanizadora (Estaos Xuníos) ye la nueva película de Joel Potrykus, una de les miraes más singulares del cine independiente norteamericanu, de quien vimos Relaxer nel FICX en 2018. Devastador na so llectura sociopolítica de l’América actual, el filme entemez referencies a Dostoyevski o Sartre con guiños a obres de xéneru como Faces of Death o la saga Saw. La cinta preséntase en Xixón tres el so pasu pel Festival neoyorquín de Tribeca, onde l’actor Joshua Burge llogró una Mención Especial.

_{Vulcanizadora de Joel Potrykus}

El cineasta arxentín Matías Piñeiro repite nel FICX tres participar en 2020 con Isabella y en 2021 con Sycorax (curtiumetraxe dirixíu con Lois Patiño). Les sos películes fueron galardonaes en festivales internacionales como Locarno, BAFICI  o Mar de Plata. Filmada en 16 mm con una cámara Bolex, Tú me abrasas (Arxentina, España) constrúi’l so universu a partir de la mitoloxía griega. Tres les sos aventures shakesperianes, Piñeiro atrévese nesta ocasión con Los diálogos con Leucó de Cesara Pavese, nos que la poeta Safo cavilga cola ninfa Britomartis sobre’l deséu y la muerte. La película compite na Sección Oficial Albar tres el so pasu pela Sección Encounters de la Berlinale.

Matthias Glasner firma Dying (Alemaña), una estraordinaria película percorrida per un afiláu humor negru que-y valió l’Osu de Plata al Meyor Guion na Berlinale y dellos Premios Lola del Cine Alemán, y la pre-nominación a los European Film Awards. Al traviés d’una estructura episódica, el director retrata con maestría’l fracasu y la redención de los miembros d’una familia.

La Sección Oficial Retueyos suma nuevos y atractivos estrenos a la so programación

Peaches Goes Bananas (Francia, Bélxica), ye l’últimu trabayu de la directora francesa Marie Losier. Nesta ocasión, la persona cimera de la semeya nel cine avérase a la famosa y provocadora cantante y compositora canadiense Peaches y failo cola midida afayadiza qu’esiste ente la cara pública y privada de l’artista. Tres el focu que’l FICX-y dedicó en 2011 y de presentar en Xixón Cassandro The Exotico! (2018) y Felix in Wonderland (2019), Losier torna a la Sección Oficial Retueyos con Peaches Goes Bananas, obra que tuvo’l so estrenu mundial nel Festival de Venecia.

_{Peaches Goes Bananas de Marie Losier}

January 2 (Hungría) ye’l segundu llargumetraxe de Zsófia Szilágyi, directora que nel so debú (One Day) compitió nel FICX en 2018 tres llograr el Premiu FIPRESCI na Selmana de la Crítica de Cannes. Perbién interpretada y con una puesta n’escena enllena de fuerza, January 2 acompaña a una muyer que se separta del so home y cámbiase colos sos dos fíos y l’ayuda d’una amiga col enfotu de reconstruyir la so vida. La película va competir na Sección Oficial Retueyos tres pasar pela Biennale College Cinema de la Mostra de Venecia.

_{January 2 de Zsófia Szilágyi}

La ópera prima ablucante de Jaydon Martin, Flathead (Australia), llega a Xixón tres recibir la Mención Especial del Xuráu nel Festival de Rotterdam. Nesta conmovedora cinta de non-ficción en glorioso blanco y negro, el prometedor cineasta retrata la ciudá australiana de Bundaberg al traviés d’un home que torna al so llugar d’orixe col enfotu de salvase y a quien el director s’avera con una desbordante sensibilidá.

El 62 FICX desvela los primeros títulos de la Sección Oficial de Curtiumetraxes

El cineasta austriacu Johann Lurf, a quien el Festival dedicó un ciclu en 2018 y con unes obres que fueron proyectaes en festivales internacionales de referencia como Sundance o Rotterdam, codirixe Revolving Rounds (Austria) cola artista ya investigadora Christina Jauernik. Ye un curtiumetraxe d’estructura circular filmáu en 16 y 35 mm que s’adientra nes llendes de la percepción. Revolving Rounds llega al FICX tres llograr la Mención Especial del Xuráu en Locarno y pasar per Toronto y Nueva York.

Tamién tres ser amosáu nos festivales de Toronto y Nueva York, Being John Smith (Reinu Xuníu) de John Smith compite na Sección Oficial de Curtiumetraxes del FICX. Nel so últimu trabayu, l’icónicu cineasta de vanguardia inglés cavilga sobro la so vida, la so trayectoria y el so legáu al traviés d’una prestosa y desarmante auto-biografía.

Tres curtiumetraxes d’animación van poder vese anguaño na Sección Oficial del FICX. Ye’l casu de Sheep Out (Polonia) onde la directora Zofia Klamka ufierta una perguapa hestoria na que l’axitada rutina de la so protagonista (una diseñadora d’animación), ruémpese cuando atopa’l dibuxu d’una oveya. El curtiumetraxe va tener el so estrenu español nel certame xixonés tres percorrer los festivales de Sydney y Annecy.

El FICX va cuntar tamién col estrenu n’España de Todos los futuros (Francia, Arxentina). Nesta animación, la realizadora Bárbara Cueto presenta una fascinante y colorida alegoría sobre la creación y destrucción del mundu. La banda sonora que conduz el curtiumetraxe cuerre a cargu del compositor neerlandés Jacco Gardner.

_{Todos los futuros de Bárbara Cerro}

Pela so parte, el director rumanu Emanuel Parvu, qu’anguaño compitió na Sección Oficial del Festival de Cannes, llega al FICX con Better This Way (Rumanía). El curtiumetraxe, estrenáu nel Festival de Cine de Cracovia, acompaña a un mozu de dieciséis años que ye afrelláu pola so orientación sexual.

El Festival va cuntar, amás, col estrenu mundial de Closeout (Lituania). Nel curtiumetraxe de la cineasta Agnė Girsaitė, una moza entérase de que la casa del so difuntu güelu ta en venta y, con ella, les alcordances que formen parte de la so identidá.

_{Closeout de Agnė Girsaitė}

FICX Premiere sigue esbillando les sos xoyes d’estrenu

La premiere europea de Tesis para una domesticación de Javier Van der Couter y los estrenos estatales Te separas mucho de Paula Veleiro y d’A Shrine d’Abdolreza Kahani tamién van formar parte de la programación de FICX Premiere. Estos títulos súmense a los yá anunciaos In the Land of Brothers d’Alireza Ghasemi & Raha Amirfazli; Imperial Princess de Virgil Vernier; C’est n’est qu’un au revoir (So Long) de Guillaume Brac; Monstruo de Xibalba de Manuela Irene (apocayá galardonada col Premiu al Meyor Llargumetraxe Mexicanu nel Festival Internacional de Cine de Monterrey); y L’edat imminent de Col·lectiu Vigília (tamién presente na Sección Enfants Temibles).

El cineasta arxentín Javier Van de Couter, que llogró con Implosión el premiu a la Meyor Película de la Sección Tierres en trance del 58 FICX, presenta agora Tesis para una domesticación (Arxentina, México). La cinta cunta la hestoria d’una esitosa actriz, el so maríu y el so fíu adoptáu. El so esfuerzu por resultar socialmente aceptaos va ser puestu en xaque cola visita al pueblu familiar. Protagonizada pola actriz y escritora Camila Sosa Villada, y basada na so novela homónima, Tesis praa una domesticación va tener el so estrenu européu nel FICX tres el so pasu pel Festival Internacional de Cine de Chicago.

_{Tesis sobre una domesticación de Javier Van de Couter}

Te separas mucho (España) ye la ópera prima de la tamién montadora Paula Veleiro. Col material grabáu cola so pareya los sos 9 años de relación y los vídeos domésticos de sos padres, rexistraos ente 1985 y 1990, la cineasta enfréntase a la so propia separtación y al esbarrumbe de la rellación de los sos proxenitores nun formosu exerciciu de sinceridá.

Abdolreza Kahani, director iranín galardonáu en prestixosos festivales internacionales como Karlovy Vary, Damascu o Tesalónica, firma con  A Shrine (Canadá, Francia, Irán) una risondera y emotiva película sobre un home que, tres entamar como negociu la creación d’un santuariu ambulante, va empezar a duldar de la so integridá moral. El filme, presentáu nel Festival d’Edimburgo, va tener el so estrenu estatal nel 62 FICX.

Los realizadores asturianos Asur Fuente & Sergio Montero codirixen Tres hombres no pueden ocultarse bajo la tapa de un puchero, un llargumetraxe rodáu nel Valle de San Mamés y L’Entregu col que s’averen a una muyer que guarda nun zulu, so la cocina de la so casa, a tres homes en busca y captura tres la derrota del réxime republicanu.

62 Festival Internacional de Cine de Xixón cuntará como cada añu cola so Seición de Pases Especiales, que van averar al públicu dalgunos de los títulos más esperaos del cine d’autor contemporaneu.

El prestixosu cinesta Albert Serra vuelve al FICX pa presentar Tardes de soledad(España, Francia, Portugal), una de les obres más arriesgaes de la so carrera hasta la fecha. Dotáu d’una caligrafía audiovisual ablucante, el direutor ufierta un poliédricu y enxamás vistu averamientu cinematográficu a la tauromaquia, que resultó premiáu como Meyor Película de mou unánime pol Xuráu Internacional de la recién concluída edición del Festival de San Sebastián, que calificó al filme como “una obra d’arte cinematográfica que se caltendrá como documentu ineludible”. Amás del máximu galardón de la Seición Oficial, la película recibió en San Sebastián el Premiu del Atenéu Guipuzcoanu y el Premiu Feroz Zinemaldia.

El certame xixonés contó en delles ocasiones cola presencia de Serra, que tien, ente otros reconocimientos internacionales, el Lleopardu d’Oru de Locarno, el Premiu Especial del Xuráu Un Certain Regard en Cannes, el Premiu Jean Vigo y dos nominaciones a los Premios César de l’Academia Francesa. El cineasta, qu’en 2023 fizo entrega en Xixón del Premiu d’Honor a la direutora de fotografía francesa Agnès Godard y un añu enantes presentó Pacifiction nel FICX, regresa en 2024 col so últimu trabayu xunto a la productora Montse Triola.

_{Tardes de soledad de Albert Serra}

Amás de la yá anunciada Eight Postcards from Utopia, que compite na Seición Oficial Albar, el Festival cuntará col estrenu absolutu n’España d’otra película dirixida por Radu Jude nos sos Pases Especiales. Sleep #2 (Rumanía), faciendo’l titulu referencia esplícita a la película Sleep d’Andy Warhol, céntrase per un añu na tumba del iconu del pop-art. La película, de calter vanguardista y fondamente emotiva,tuvo’l so estrenu nel pasáu Festival de Cine de Locarno.

_{Sleep #2 de Radu Jude}

Pablo Hernando, cineasta vascu dotáu d’un estraordinariu sentíu pa la creación d’atmósferes de suspense, y a quien el Festival dedicó un focu en 2016, dirixe y edita’l so segundu llargumetraxe en solitario, Una ballena (España, Italia). La película, que s’estrenará próximamente nel Festival de Sitges, ye un potente thriller neo-noir de xéneru fantásticu, protagonizáu por Ingrid García-Jonsson (actriz fetiche del cineasta) y el veteranu Ramón Barea, qu’acompañarán a Pablo Hernando en Xixón pa presentar el so últimu y más cobiciosu llargumetraxe dientro de los Pases Especiales del FICX.

Tamién tres el so pasu pela Seición Oficial del Festival de Sitges llegará a Xixón la ópera prima d’Enrique Buleo, cineasta singular, responsable d’allumantes curtiumetraxes precendentes que pasaron pel FICX. Rituales paranormales y apaiciones d’espectros nun pequeñu pueblu manchegu danse cita en Bodegón con fantasmas (España, Serbia), una comedia negra de protagonismu coral patrocinada pola productora d’Alejandra Mora xunto cola productora de Juan Cavestany, Cuidado con el perro, Sideral y la serbia This and That.

La cineasta navarra Andrea Jaurrieta visitará Xixón pa presentar un Pase Especial de la película Nina (España), ganadora del Premiu Especial del Xuráu de la Crítica nel pasáu Festival de Málaga Col so segundu llargumetraxe, Jaurrieta firma un vibrante western contemporaneu protagonizáu por Patricia López Arnaiz (actriz galardonada de recién cola Concha de Plata en San Sebastián), acompañada nel repartu por Dario Grandinetti. La rellumante direutora d’Ana de día repite nel certame xixonés tres participar como miembru del Xuráu Internacional nel 55 FICX y presentar na pasada edición el so curtiumetraxe Ballenas aplastadas por el hielo.

_{Nina de Andrea Jaurrieta}

El direutor asturianu Antonio R. Cabal presenta dientro de los Pases Especiales del FICX la película Sahara. Fin de viaje(España). La película céntrase nuna pareya de mozos europeos, imprudentes y poco preparaos, que nos años 70 adiéntrense nel desiertu con un touterrén a la gueta aventures y que se ven obligaos a encarar situaciones tope. La película tien la peculiaridá de surdir del negativu orixinal d’una obra anterior del cineaste, Sahara, estrenada en 1985 y co-protagonizada por Maru Valdivielso.

_{Sahara. Fin de viaje de Antonio R. Cabal}

A estes películes, que formarán parte de los Pases Especiales del FICX, sumaránse les yá anunciaes obres cinematográfiques caberes del maestru Jean-Luc Godard, Scénarios y Exposé du film annonce du film “Scénario” (Francia), que s’estrenarán n’España en Xixón y que sedrán presentaes pola so productora, Mitra Farahani, collaboradora estrecha de la cabera etapa de Godard, y tamién comisaria de la esposición complementaria que podrá esfrutase tamién en Xixón.

El 62 FICX va cuntar na so Sección Enfants Terribles, especialmente dedicada a la infancia y la mocedá, con 16 escepcionales títulos qu’incluyen l’estrenu mundial d’una de les sagues más reconocíes del cine d’animación contemporaneu, Ernest & Célestine, cuentos de primavera, d’Aurélie Raphaël. Amás, esta sección va acoyer un total de 12 estrenos n’España, ente los que tán películes como Akiko: The Flying Monkey, de Veit Helmer, o Jippie Nun More!, de Margien Rogaar. La selección Enfants Terribles tien nesta edición hasta 7 óperes primes y dellos llargumetraxes que cunten con un destacáu percorríu en prestixosos festivales internacionales como Cannes, Locarno o Annecy.

Como cada añu, los centros educativos van tener tamién al so algame una guía didáctica cola que se convida a la reflexón sobro les películes, incluyendo dinámiques a facer tanto de forma previa como dempués del visionáu de les obres nel Festival.  Esta guía, que cuerre al cargu del escritor y críticu cinematográficu Jesús Palacios, tien encamientos, actividaes y entrugues pal alumnáu, y va tar tamién disponible en formatu dixital na web del FICX. Amás, el Festival va entamar alcuentros con cineastes tres les proyeiciones y dos talleres p’afondar na interpretación actoral y na animación stop-motion.

El programa Enfants Terribles convirtióse nuna actividá imprescindible pa gran parte de la comunidá educativa asturiana, como lo demuestren los más de 250.000 alumnos/es y docentes qu’asistieron a les proyecciones y actividaes de la sección dende los sos entamos. En 2023 superóse nun 12% los datos de públicu de Enfants Temibles de la 60 edición. Otra amuesa del potencial del Festival ente’l públicu mozu ye que de los 16 bonos d’entraes pa mozos vendíos en 2019 crecióse hasta algamar los 212 en 2023.

Enfants Terribles: una visión necesariamente humanista sobre’l mundu

Dos de los títulos d’Enfants Terribles que se van estrenar n’España nel Festival, tamién van formar parte de la Sección Oficial Albar. Son When the Light Breaks, de Rúnar Rúnarsson, y de L’Histoire de Souleymane (The Story of Souleymane), de Boris Lojkine; dambos tuvieron la so premiere mundial na Sección Un Certain Regard del Festival de Cannes.

Sele en dramatismu y con una sensibilidá escepcional, la última película del islandés Rúnar Rúnarsson, When the Light Breaks (Islandia, Países Baxos, Croacia, Francia), enfrenta a un grupu de mozos al inesperáu duelu pola muerte d’un amigu que yera tamién el noviu de dos d’elles.

_{When the Light Breaks de Rúnar Rúnarsson}

L’Histoire de Souleymane (The Story of Souleymane) (Francia), del director francés Boris Lojkine, sigue a un mozu guineanu que trabaya illegalmente como repartidor en París mientres prepara una entrevista pa pidir asilu políticu. Con ecos al cine de los aclamaos hermanos Dardenne, el filme, tan duru como veraz, destaca por un guión vertixinosu y la impecable interpretación del so protagonista, que-y valió’l Premiu al Meyor Actor en Cannes, onde’l filme tamién llogró’l Premiu del Xuráu Un Certain Regard.

_{L’Histoire de Souleymane (The Story of Souleymane) de Boris Lojkine}

Pela so parte, Veit Helmer, autor de filmes como Góndola, Tuvalu o The Bra, protagonizada por Paz Vega y Denis Lavant, va estrenase n’España nel FICX, Akiko: The Flying Monkey (Alemaña). Una fábula animalista que pasó pel Festival de Locarno que sigue’l periplu d’un monu que llogra escapar del zoo p’atopar a la so familia cola ayuda d’otros animales.

_{Akiko: The Flying Monkey de Veit Helmer}

Con grandes dosis d’humor y una estética que per momentos recuerda a Wes Anderson, l’últimu llargumetraxe de la directora holandesa Margien Rogaar, Jippie No More! (Países Baxos). El so estrenu estatal tamién va acoyelu’l FICX. La película acompaña a un mozu con síndrome de Down que se xunta cola so familia en casa de so güelu pa preparar la boda de la so hermana. El llargumetraxe llogró’l Premiu del Xuráu Mozu y el Premiu del públicu a la Meyor Película Infantil Nacional nel Festival Cinekid.

_{Jippie No More! de Margien Rogaar}

Una de les sagues más reconocíes de la nueva animación europea, l’adaptación de los llibros infantiles del escritor y ilustrador belga Gabrielle Vincent, Ernest & Célestine, estrena mundialmente nueva entrega nel FICX. Nesta ocasión, ye Aurélie Raphaël quien asume la dirección de la secuela roblando asina’l so primer llargumetraxe.  Con Ernest & Célestine, cuentos de primavera (Francia), l’osu y la ratonina más entrañables de l’animación, vuelven a encandilanos cola so perguapa amistá. Nel so enfotu de tender pontes de collaboración con otros certámenes en llugar de fomentar la competitividá, el FICX comparte esti estrenu con Mi Primer Festival, destináu a neños y neñes de 2 a 12 años y que se celebra en Barcelona.

_{Ernest & Célestine, cuentos de primavera de Aurélie Raphaël}

Como parte d’esta collaboración con Mi Primer Festival, el FICX presenta’l segundu llargumetraxe de la cineasta Kristina Dufková, Living Large (República Checa), una llograda animación stop-motion que llogró’l Premiu especial del Xuráu nel Festival d’Annecy y que tamién foi escoyida nel Festival de Karlovy Vary. Con esta película sobre un carismáticu adolescente que sufre obesidá, la directora avérase con sutileza a temes delicaos como la salú mental, la separtación de los proxenitores o l’acosu escolar.

_{Mi vida a lo grande de Kristina Dufková}

Pela so parte, la pareya de cineastes Tania Vincent & Ricard Cussó codirixen The Sloth Lane (Australia). Nesta inventiva película d’animación 3D australiana, que tamién s’estrenó nel Festival d’Annecy, una familia d’osos perezosos que rexenta un restaurán dende fai delles xeneraciones piérdelo too por culpa d’un tornáu y vese obligada a emigrar al país vecín pa tratar d’empezar una nueva vida. Grandes asuntos como la migración, el trabayu o los venceyos familiares, rescamplen nesta aventura d’escéntricos personaxes non exenta de diversión.

_{The Sloth Lane de Tania Vincent & Ricard Cussó}

Como ye vezu, el FICX acueye na so programación delles óperes primes. Ye’l casu de Last Swim (Reinu Xuníu), cola que’l director inglés d’ascendencia indio-iranina Sasha Nathwani ganó l’Osu de Cristal a la Meyor Película de la Sección Generation 14plus na Berlinale. Ye un filme d’aceptación y tránsitu hacia la madurez, nel qu’una moza comparte un soleyeru día de branu londinense colos sos amigos al empar que guarda un angustiosu secretu.

_{Last Swim de Sasha Nathwani}

Lea Becker, directora de series como Kitz, tamién debuta nel llargumetraxe, y failo con Skategirls – Get Up (Alemaña), una lluminosa película sobre cuatro amigues qu’entrenen nel branu pa presentase a un concursu de skate femenín. Nella, la xunión ente muyeres y la representación LGTBI garren gran relevancia.

_{Skategirls – Get Up de Lea Becker}

The Mountain (Nueva Zelanda) ye’l debú de Rachel House, directora de teatru y actriz maorí avezada nes películes del director Taika Waititi, quien robla nesta ocasión como productor executivu. Con humor y sensibilidá, la película acompaña a una neña enferma de cáncer que s’escapa del hospital cola misión d’esguilar el monte Taranaki. The Mountain va poder vese nes pantalles del FICX tres el so estrenu nel Festival Internacional de Cine de Toronto.

_{The Mountain de Rachel House}

L’edat imminent (España), de Col·lectiu Vigília, ye la primer película d’esti colectivu de cineastes vinientes del Grau de Comunicación Audiovisual de la Universidá Pompeu Fabra. Tres llograr delles reconocencies na so fase de desenvolvimientu como proyectu, ente ellos el Premiu WIP España del Festival de Málaga, L’edat imminent tuvo’l so estrenu mundial nel Festival de Cine de Giffoni (Italia), col que’l FICX collabora dende 2003 promoviendo l’intercambiu de mozos pa que formen parte del Xuráu Mozu en dambos certámenes. El llargumetraxe, dirixíu pa Clara Serrano & Gerard Simó, pescuda la relación ente un mozu y so güela pola que foi criáu y a la qu’agora él tendrá de curiar; y failo dende un llugar cercanu que los cineastes revelen cola naturalidá de vivir, de lo propio. La película va formar parte tamién de la seición FICX Premiere, que va estrenar a nivel estatal dalgunes de les películes más destacaes del añu nel ámbitu del cine d’autor internacional.

_{L’edat imminent de Col·lectiu Vigília (Clara Serrano & Gerard Simó)}

Premiu del Públicu na Selmana Internacional de la Crítica de Venecia, la ópera prima del director franco-británicu Jethro Massey, Paul & Paulette Take a Bath (Reinu Xuníu) llega a Enfants Terribles pa ufiertar al públicu adolescente del Festival una comedia negra y poco complaciente desenvuelta en París, en parte romántica y en parte hestórica, onde un home de los Estaos Xuníos inocente y una francesa d’humor cambiante, tienen una estraña relación.

_{Paul & Paulette Take a Bath de Jethro Massey}

El 62 FICX va cuntar tamién col estrenu estatal de Bis Repetita (Latin For All) (Francia), otru debú y una risondera comedia na que la so directora, Émilie Noblet, acompaña a una desmotivada docente de llatín que va viaxar col so alumnáu a Italia pa representar al so institutu nuna competición internacional, que van intentar ganar con métodos más que cuestionables.

_{Bis Repetita (Latin For All) de Émilie Noblet}

Pela so parte, Ce n’est qu’un au revoir (So Long) (Francia), el yá anunciáu llargumetraxe del reconocíu director Guillaume Brac, que tamién s’estrenará n’España en FICX Premiere, va tar tamién presente n’Enfants Terribles tres el so pasu per Cannes. Nesta ocasión, el cineasta francés ufiértanos una delicada semeya d’un grupu de mozos que vive nun internáu y enfréntase un inciertu futuru onde tolo que conocen hasta agora, incluyida la so amistá, tíñese cola murnia d’una despidida.

_{Ce n’est qu’un au revoir de Guillaume Brac}

Dempués de la gran reconocencia llograda con La vida de calabacín, el direutor suizu Claude Barres presenta Salvajes (Suiza, Francia, Bélxica), una esperanzadora fábula ecoloxista n’animación stop-motion que revela les temibles consecuencies de la deforestación. Una neña que vive na selva tropical en Borneo, acueye a una cría d’orangután dempués de que la empresa que ta desaniciando la xungla dexa güérfanu al animal. La película, que va tener la so premiere española nel Festival de Sitges, llega a les secciones Enfants Tembles y Esbilla del FICX, tres estrenase como proyección especial en Cannes y competir na Sección Oficial del Festival de Cine d’Animación d’Annecy.

_{Salvajes de Claude Barras}

Enfants Temibles acueye, fuera de competición, l’estrenu del tercer curtiumetraxe de Patricia de Luna.  Las piedras de Luna (España) aborda la problemática de la conciliación familiar y llaboral averándose a la relación d’una neña de seis años con so madre, una auxiliar de vuelu que trai de caunu de los sos viaxes una piedra que va faer viaxar tamién a la so fía al traviés de la imaxinación.

_{Las piedras de Luna de Patricia de Luna}

El 62 FICX mira a los güeyos del cine independiente

El lema d’anguaño, “cara a cara col cine independiente”, fala de la oportunidá única qu’ufierta’l FICX de favorecer l’alcuentru ente’l públicu y los/les cineastes que tán marcando la escena cinematográfica internacional, y pon en valir la dimensión abarcable y el calter cercanu del certame y de la ciudá de Xixón, l’humanismu propiu de les sos propuestes fílmiques y la complicidá d’un públicu diverso y entregao que volverá enllenar les sales del 15 al 23 de payares próximos.

La imaxe xeneral de la 62ª edición del FICX céntrase nes cares d’una serie d’heteroxéneos personaxes na que públicu y cineastes garren el mesmu protagonismu. El diseñador gráficu y illustrador Marco Recuero, encargáu de la so realización, señala inspirase “nos llibros infantiles que diseñó El Lissitzky a partir de formes básiques y una paleta de color mínima”. Tocante a los colores que componen el diseñu, Recuero indica optar pol rosa “en combinación col color corporativo del FICX, porque tresmite aselu, optimismu y relaxación”.

_{Imagen del 62FICX}

Nel casu de la imaxe d’Enfants Temibles, los personaxes de la illustración que representen a les nueves xeneraciones d’espectadores sofítense na mirada cinematográfica guiada con entusiasmu hacia l’icónicu güeyu del FICX.

_{Imagen Enfants Terribles}

Celia Viada Caso convídanos a cavilgar sobro la mirada na pieza cinematográfica qu’anguaño van inxertar los pases del Festival

Dende fai cuatro ediciones, el Festival cunta con una curtia pieza cinematográfica fecha por cineastes d’Asturies como introducción a les sos proyecciones. Nesta iniciativa participaron enantes realizadores como Ramón Lluís Bande, Elisa Cepedal y Diego Llorente. En 2024 llega la vez a Celia Viada Caso, quien robla anguaño la cabecera del 62 FICX. La direutora, qu’en 2020 llogró nada menos que siete premios nel Festival cola so ópera prima La calle del agua y que llogró la Mención Especial del Xuráu Oficial col so curtiumetraxe Gregoria na pasada edición del FICX; ufierta con esta pieza un rotundu y acertáu análisis del exerciciu cinematográficu sirviéndose namás d’un espeyu y dos butaques (les del Teatru Xovellanos), qu’ella mesma, cola ayuda del tamién cineasta Dani Álvarez, asitia lliteralmente en distintos espacios de la redolada asturiana. Nes sos propies palabres: “La pieza surde arriendes de pensar sobre un oxetu en desusu, unes butaques antigües de teatru. L’espeyu qu’apaez al entamu y final de la pieza dexa cavilgar sobre la mirada, sobre lo que vemos y lo que queda oculto, el reflexu y lo qu’hai detrás”.

Retaguardia, l’últimu trabayu del reconocíu cineasta asturianu Ramón Lluís Bande, tendrá’l so estrenun internacional en FICMonterrey esti vienres y estrenaráse n’España na Seición Oficial Albar del FICX. Tres algamar en 2018 el Premiu Especial del Xuráu con Cantares de una revolución, Ramón Lluís Bande compite nesta ocasión xunto a cineastes como los yá anunciaos Bruno Dumont, Claire Simon o India Donaldson.

Col rigor documental que carauteriza al so autor, Retaguardia trata de reconstruyir una coleición de películes que se pudieron rodar n’Asturies nel añu 1937 y imaxina un posible cine de propaganda que, sofitáu dende les instituciones y les organización polítiques y sindicales republicanes asturianes, pudo ser desendolcáu pol equipu periodísticu del diariu socialista Avance. El cineasta y ensayista sofítase, nesta ocasión, nes series de semeyes de Constantino Suárez y los testos d’Ovidio Gondi, Juan Antonio Cabezas o Juan Manuel Vega Pico.

_{Retaguardia de Ramón Lluís Bande}

El Festival tamién cuntará na so seición FICX Premiere col estrenu n’España de Monstruo de Xibalba. La ópera prima como direutora de la cineasta mexicana Manuela Irene, que tuvo’l so estrenu mundial nel Festival Internacional de Cine d’Edimburgo y que tamién se proyeutara nel certame mexicano FICMonterrey, llogra conxugar aventura y reflexones de fondura esistencial al empar que s’adientra nel misteriu de la lleenda maya peles selves de Yucatán y acompaña a un neñu obsesionáu cola muerte.

El Festival Internacional de Cine de Xixón ta organizáu por Divertia SA, con sofitu d’Europea Creativa y la financiación del Institutu de Cinematografía y de les Artes Audiovisuales (ICAA). Ye una actividá subvencionada pol Gobiernu del Principáu d’Asturies per aciu la Conseyería de Cultura, Política Llingüística y Deporte. Cunta con FILMIN como Dixital Partner.

_{Monstruo de Xibalba de Manuela Irene}

Crossroads – SSIFF  FICX, la seición cola que’l Festival Internacional de Cine de Xixón y el Festival Internacional de Cine de San Sebastián (SSIFF) collaboren con una programación común, cumple siete años y celébralo col entusiasmu de convertise nunu de los apartaos más esitosos del FICX. Per él pasaron cineastes como Maider Fernández Iriarte con Las letras de Jordi, Bertrand Bonello con Zombie Child o Javier Macipe con La estrella azul, película que foi una de les tres pre-candidates a representar a España nos Premios Óscar en 2024.

Ente los seis atractivos títulos que van poder esfrutase en Crossroads – Zinemaldia anguaño ta To a Land Unknown, nel que’l director palestín-danés Mahdi Fleifel firma la hestoria de dos mozos refuxaos palestinos qu’intenten aforrar pa mercar unos pasaportes falsos colos que llegar de Grecia hasta Alemaña. El cineasta ufiértanos, nun intensu thriller, un sólidu relatu sobre vulnerabilidá y frustración perbién interpretáu que pudo vese na pasada edición del Festival de Cannes.

_{To a Land Unknown de Mahdi Fleifel}

Reas ye’l segundu llargumetraxe de la directora arxentina Lola Arias y segunda participación en Crossroads, que cuntó con Teatro de guerra en 2018 tres el so pasu pel Festival Internacional de Cine de Berlín. Con Reas, la directora ufiértanos un musical radiante nel que persones cis y trans que tuvieron preses en delles cárceles arxentines pescuden les sos alcordances al traviés de la música y la danza.

_{Reas de Lola Arias}

Antón Álvarez, más conocíu como C. Tangana na so faceta musical, debuta como director con La guitarra flamenca de Yerai Cortés, un personal homenaxe al músicu Yerai Cortés que xira alredor d’un secretu familiar que tien de ser contáu y que va inaugurar la sección New Directors del Festival de San Sebastián. N’Esta ambición desmedida, película dirixida y producida por Little Spain que sigue la trayectoria de C. Tangana, l’artista espresaba yá la so intención de dirixir cine y el resultáu va poder vese en payares nel FICX.

_{La guitarra flamenca de Yerai Cortés de Antón Álvarez}

Jacques Audiard, cineasta insigne en festivales de sonadía como Cannes, Venecia y Berlín, presenta una de les películes d’autor del añu y la so obra más arriesgada hasta la fecha: Emilia Pérez, un musical que retrata la unión de les muyeres frente a la violencia de xéneru, doblemente premiáu en Cannes y que cunta cola participación de Selena Gómez. L’oscarizáu cineasta francés, que tamién tien la Palma d’Oru de Cannes y el Lleón de Plata de Venecia, va representar de nuevo a Francia nos Oscars de 2025 con Emilia Pérez.

_{Emilia Perez de Jacques Audiard}

No soy yo ye’l más recién trabayu del xenuinu y tresgresor maestru Leos Carax. El director de cultu de películes como Los amantes del Pont-Neuf, Mala sangre, Holy Motors o Annette, ufiértanos nesta ocasión un emocionante autorretratu nel que revisa los sos 40 años de filmografía. Tres el so pasu pela Sección Cannes Premiere y coincidiendo col 25 aniversariu de Pola X, el FICX va proyectar de nuevo esti trabayu de Carax dientro de la sección Crossroads.

_{No soy yo de Leos Carax}

François Ozon ye otru nome avezáu de prestixosos certámenes como Berlín, Venecia y San Sebastián, certame nel que llogró, nel añu 2000, la Concha d’Oru y el Premiu del Xuráu al Meyor Guión con Dans la maison.  Y ye precisamente na Sección Oficial de San Sebastián onde anguaño s’estrena mundialmente Cuando cae el otoño. Nella, la sele cotidianidá d’una muyer nun pueblu de Borgoña vese alteriada cuando apaecen les rocees y pantasmes del pasáu.

_{Cuando cae el otoño de François Ozon}

Los seis títulos qu’anguaño formen parte de Crossroads van poder vese en delles de les secciones del festival donostiarra; un festival col que’l FICX comparte llinies artístiques y tamién dos oxetivos irrenunciables: fomentar la collaboración envede la competitividá ente certámenes y aumentar la visibilidá de películes d’autor d’especial interés.

_{José Luis Rebordinos, director del SSIFF, y Alejandro Díaz Castaño, director del FICX}

La 62ª edición del Festival Internacional de Cine de Xixón, que se celebrará del 15 al 23 de payares, adelanta nueve de los títulos que van tener el so estrenu absolutu n’España como parte de la so programación. Nengún d’ellos cunta con distribución comercial asegurada nel nuesu país, lo que vien a confirmar l’apuesta del Festival por favorecer l’alcuentru d’ayalgues del cine contemporaneu col envís del so posible espardimientu posterior (más de 30 títulos amosaos nel FICX en 2023 llograron estrenase comercialmente n’España darréu). Una escoyeta que respuende al compromisu de dar voz a obres que, pola so audacia y/o calter arriesgáu nun llegarán nin a les sales nin a les plataformes, lo que convertirá la so proyección nel Festival nuna oportunidá única y irrepetible pa descubriles. Na so dimensión concebida a escala humana, el FICX ta lloñe de querer l’acumulación de títulos y estrenos, polo qu’esbilla y mima l’amestáu de cada obra cinematográfica dientro de los distintos apartaos que componen la so programación.

Ente los nueve títulos d’esti avance entemécense nomes consagraos del cine internacional con cineastes nuevos que se xunirán a la yá anunciada presencia de la directora Gala Hernández, quien protagoniza ún de los focos del 62 FICX. La esbilla que presentamos inclúi xéneros tan estremaos como’l neo thriller heterodoxu, el cine-ensayu más irónicu y lúdicu, la ficción de raigañu realista, el retratu pantasmal nel cantu de la irrealidá o la ciencia ficción d’autor más iconoclasta y allocada.

ALBAR: EL REGRESU DE TRES CINEASTES XUNÍOS AL FICX

El Festival adelanta tres sobresalientes títulos que formarán parte de la Sección Oficial a competición Albar, na que concursen dalgunes de les películes más esperaes del añu: L’Empire,de Bruno Dumont; Apprendre (Elementary), de Claire Simon y Eight Postcards from Utopia, de Radu Jude & Christian Ferencz-Flatz.

El francés Bruno Dumont, director de cultu en Festivales como Berlinale y Cannes, y vieyu conocíu del FICX, qu’en 2006 dedicó la primer retrospectiva a la so obra n’España, firma’l so particular homenaxe a la ciencia ficción con L’Empire (Francia, Italia, Alemaña, Bélxica, Portugal). Trátase d’una de les películes más arriesgaes hasta’l momentu d’un cineasta que pasó pelos xéneros como pocos, atreviéndose dende la so llibre y inigualable visión, col musical, la comedia o’l cine históricu. L’Empire, cola qu’algamó l’Osu de Plata nel recién Festival Internacional de Berlín, ye l’hilarante Star Wars que namás un maestru que nun tien que rindir cuentes a naide como Bruno Dumont podría dirixir.

_{L’Empire de Bruno Dumont}

Tamién venceyada fondamente al Festival, la estraordinaria directora francesa Claire Simon, qu’en 2006 compitió na Sección Oficial del FICX con Ça brûle y en 2018 visitó Xixón con Premières Solitudes, presenta nesta ocasión, tres el so estrenu nel Festival de Cannes, Apprendre (Elementary) (Francia). Trátase d’un precisu análisis del sistema educativu francés col que la cineasta nos regala una película fondamente humanista na que, amás de firmar un emocionante retratu del alumnáu, desendolca’l so propiu homenaxe al profesoráu.

_{Apprendre de Claire Simon}

Premiáu en Xixón delles veces (incluyendo la edición anterior) y ganador del Osu d’Oru de Berlín en 2021, otru escepcional cineasta que vuelve a confiar nel FICX pa estrenar n’España’l so nuevu trabayu ye Radu Jude. El director por antonomasia de la sátira social vuelve con Eight Postcards from Utopia (Rumanía), llargumetraxe que firma xunto al filósofu Ferencz-Flatz y que se presentó nel pasáu Festival Internacional de Cine de Locarno. Con un claru calter lúdicu, el filme, que se construye partiendo de publicidaes televisives de la dómina post-Ceausescu, xenera fondes reflexones antropolóxiques y amuésase como un espeyu del país a lo llargu de los últimos años.

_{Eight Postcards from Utopia de Radu Jude & Christian Ferencz-Flatz}

RETUEYOS: ARRIESGAR ENSIN MIEU A EQUIVOCASE

La Competición Retueyos de la Sección Oficial, qu’axunta a autores colos sos primeros, segundos o terceros llargumetraxes, avanza tamién tres títulos de la so programación: Algo viejo, algo nuevo, algo prestado d’Hernán Rosselli, y dos óperes primes: Fogo do vento, de Marta Mateus y Mother Vera, de Cécile Embleton & Alys Tomlinson.

Algo viejo, algo nuevo, algo prestado (Arxentina, España), ye’l tercer llargumetraxe d’Hernán Rosselli. Inspiráu na hestoria real d’una familia que se dedica al negociu d’apuestes clandestines, el cineasta arxentín inspírase no meyor del cine policiacu pa ufiertar un neo-thriller que podría definise como la versión arxentina de l’afamada Uno de los nuestros de Martin Scorsese. La película, que causó sensación tres el so pasu pela Quincena de Cineastes de Cannes, cunta con coproducción española de Jaibo Films.

_{Algo viejo, algo nuevo, algo prestado de Hernán Rosselli}

La ópera prima de Marta Mateus, Fogo do vento (Portugal), qu’optó al Lleopardu d’Oru nel Festival Internacional de Cine de Locarno, ta producida pola directora xunto al maestru Pedro Costa, director avezáu del FiCX qu’en 2019 ganó’l Premiu al Meyor Llargumetraxe y a la Meyor Dirección Artística con Vitalina Varela. Nun ye, sicasí, la primer vez que Marta Mateus s’atreve cola direición: el so curtiumetraxe Farpões, baldios estrenóse nel Festival Internacional de Cannes en 2017. Con una guapura plástica escomanada, Fogo do vento convoca l’alcordanza de xeneraciones anteriores de la rexón portuguesa d’Alentejo dexando que los aspectos políticos y socioculturales que tán atapaos, s’asoleyen de forma orgánica.

_{Fogo do vento de Marta Mateus}

Mother Vera ye’l retratu d’una monxa moza ortodoxa a la gueta de l’autorrealización personal firmáu pola documentalista franco-británica Cécile Embleton y la reconocida fotógrafa británica Alys Tomlinson, que col so proyectu Ex-Voto algamó’l premiu Fotógrafu del añu nos Sony World Photography Awards 2018, ta nel orixe de Mother Vera, que filmada nun elegante blanco y negro, ufierta gran fuercia poética a cada imaxe. La película foi emparexada con Ida, cinta polaca dirixida por Pawel Pawlikowski que compitió nel FICX en 2013 y foi galardonada con un Oscar.

_{Mother Vera de Cécile Embleton & Alys Tomlinson}

NAZ FICX PREMIERE COMO SECCIÓN CON ENTIDÁ PROPIA

FICX Premiere surde en 2024 como sección qu’acoyerá obres singulares y d’especial valir que tendrán el so estrenu español dientro del Festival. Ye’l casu de d’In the Land of Brothers, d’Alireza Ghasemi & Raha Amirfazli; Imperial Princess, de Virgil Vernier y Ce n’est qu’un au revoir (So Long), de Guillaume Brac.

Tres el so pasu pel Festiva de Cannes en 2024, el FICX estrenará n’España l’últimu llargumetraxe de Guillaume Brac: Ce n’est qu’un au revoir (So Long) (Francia), un retratu d’enorme sensibilidá del mundu de la mocedá. El cineasta, tamién con un llargu percorríu en festivales destacaos como Locarno, Karlovy Vary o Berlinale, inauguró’l FICX en 2020 con ¡Al abordaje! El so cine destaca pola so vitalidá, el so sutil sentíu del humor y la maestría cola captura l’instante.

_{Ce n’est qu’un au revoir de Guillaume Brac}

La pareya de cineastes iraninos Alireza Ghasemi & Raha Amirfazli (Irán, Francia, Países Baxos), aníciase nel llargumetraxe con In the Land of Brothers, col qu’algamaron el premiu a Meyor Dirección na sección World Cinema Dramatic del Festival de Sundance y que llega al FICX tres el so pasu per festivales como Jeonju o Uruguay. El codirector, Alireza Ghasemi, tuvo tamién seleccionáu en Cannes en 2017 con Lunch Time. D’una honestidá y humanidá incontestables, In the Land of Brothers encárase escontra’l tópicu qu’asitia Irán como la segunda residencia pa los afganos y amuesa les adversidaes a les que se deben enfrentar les tres persones refuxaes al rodiu de les que s’articula la película.

Dueñu d’una mirada única que se traduz nun estilu visual inconfundible, el cineasta francés Virgil Vernier estrenará n’España nel FICX Imperial Princess (Francia), una película na que too ye grabao pola protagonista col so móvi; una moza rusa con unos padres que salen de Mónaco al entamu la guerra por mieu a les sanciones económiques y a la qu’acompañamos nel so determín de quedase, nun debalar nocherniegu per una ciudá que forma un escenariu d’opulencia del que nun ye parte. Estrenada esti añu mundialmente na Competición Internacional de Cinéma du Réel, Vernier vuelve a Xixón continuando una gran carrera en festivales de renome como Locarno o Cannes, tres estrenar nel FICX de 2021 el so curtiumetraxe Kindertotenlieder.

Como ye niciu d’identidá dende va décades, el FICX ufiertará per 9 díes un espaciu horizontal, afayadizu y cercanu nel que’l cine ocupara’l centru d’un cuidáu programa qu’incluirá alcuentros col públicu, charres, masterclasses, meses redondes, esposiciones como la dedicada a Jean-Luc Godard (comisariada pola cineasta y pintora iranina Mitra Farahani y organizada pol FICX y la Fundación Municipal de Cultura, Educación y Universidá Popular de Xixón), o conciertos como’l yá anunciáu Spanish Brass, dedicáu a les bandes sonores de cine d’espionaxe (organizáu en collaboración cola Sociedá Filarmónica de Xixón, el Taller de Músicos de la Fundación Municipal de Cultura de Xixón y Laboral Ciudá de la Cultura).

El Festival Internacional de Cine de Xixón ta organizáu por Divertia SA, con sofitu d’Europea Creativa y la financiación del Institutu de Cinematografía y de les Artes Audiovisuales (ICAA). Ye una actividá subvencionada pol Gobiernu del Principáu d’Asturies per aciu la Conseyería de Cultura, Política Llingüística y Deporte. Cunta con FILMIN como Dixital Partner.

El Festival Internacional de Cine de Xixón, que celebra’l so 62ª edición del 15 al 23 de payares, va cuntar con una esposición esclusiva y va proyectar los postreros dos trabayos cinematográficos del recordáu maestru Jean-Luc Godard, los curtiumetraxes Scénarios y Exposé du filme annonce du filme “Scénario”. El  so estrenu n’España va tener llugar en Xixón.

La comisaria de la esposición ye la cineasta y pintora iranina Mitra Farahani, collaboradora de Godard hasta’l so fallecimientu, quien yá visitó Xixón nel 61 FICX con Á vendredi, Robinson. L’amuesa, fecha en collaboración cola Fundación Municipal de Cultura, Educación y Universidá Popular, percuerre’l trabayu lleváu alantre por Godard pa la realización del que, según él, diba ser el so últimu proyectu: Scénario, darréu rebautizáu en plural: Scénarios. Un filme crepuscular, a manera de despidida, onde se mecen testos, dibuxos ya imáxenes en forma de collage, un métodu artesanal de facer l’esbozu d’una película en potencia al que’l maestru francés recurrió tola so carrera. Godard percuerre nesti bocetu una suerte de película que pudo ser pero finalmente nun foi, la hestoria d’una vida que remata con un autorretratu, la última imaxe de Godard, filmada na viéspora de la so muerte asistida’l 12 de setiembre de 2022.

_{Scénarios de Jean-Luc Godard}

Pela so parte, Exposé du filme annonce du filme “Scénario”, ye una pieza cinematográfica d’un añu enantes a l’anterior y na que, a manera de planu secuencia, les manes y la voz de Jean-Luc Godard presenten la película Scénario.

_{Exposé du film annonce du film “Scénario” de Jean-Luc Godard}

Focu Gala Hernández López

El FICX va dedicar anguaño unu de los sos focos a la nueva artista multidisciplinar ya investigadora murciana Gala Hernández López quien, a pesar de la so mocedá, desenvolvió yá una importante carrera como ensayista, video creadora, artista performática y, más apocayá, como cineasta.

_{Gala Hernández López}

Estudiante de cine na Universidá Pompeu Fabra de Barcelona y na Universidá Sorbonne Nouvelle de París, la incursión nel séptimu arte de Gala Hernández recueye tolos ámbitos de la so creación pa reformulalos nun formatu cinematográficu llonxanu a patrones narrativos o ensayísticos convencionales, nel qu’axunta les sos principales esmoliciones, esto ye, la incursión de la Intelixencia Artificial y la so influencia na sociedá actual, les redes sociales o’l mercáu de la cripto economía.

El FICX, que va cuntar cola presencia de la cineasta na so 62ª edición, va amosar tres de los sos trabayos. La mecánica de los fluídos (2022), curtiumetraxe documental nel que la cineasta estudia la figura d’Anarquista Anatemático, un avezáu y llargamente siguíu usuariu de la plataforma Reddit, na que’l conteníu ye escoyíu y promovíu polos sos participantes, qu’en 2018 asoleyó una nota de suicidiu sol títulu ‘Estados Unidos es responsable de mi muerte’. Un filme que recibió anguaño’l premiu César al meyor curtiumetraxe amás de ser galardonáu na SEMINCI, nel Festival Internacional de Cine Independiente de Burdeos o en Doc.Berlin.

En For here I am sitting in a tin can far above the world (2023), curtiumetraxe con un títulu qu’homenaxa’l famosu cantar Space Oddity de David Bowie, Gala Hernández narra una hestoria del futuru nel que’l mercáu de les criptomonedes esbarrumba, llevando consigo a una cantidá masiva d’usuarios d’esti sistema económicu que se ven deteníos nes sos actividaes económiques a la espera d’un tiempu meyor. Esti curtiumetraxe tuvo la so premier mundial dientro de la sección Forum de la Berlinale.

_{for here I am sitting in a tin can far above the world de Gala Hernández López}

La triloxía ciérrase con +10K, curtiumetraxe qu’anguaño ta en procesu de creación y del que la directora va amosar parte del material rodáu nel FICX. Xunto con esti rodaxe, Gala Hernández ta trabayando tamién na escritura del so primer llargumetraxe, que lleva’l títulu provisional de Dreams of Prophets.

_{+10K de Gala Hernández López}

Conciertu bandes sonores de cine

El Festival Internacional de Cine de Xixón adelanta parte de l’axenda d’actividaes complementaries de la so 62ª edición col anunciu del conciertu de bandes sonores de cine clásicu d’espíes TOP SECRET, de la mano del prestixosu quintetu de metales Spanish Brass (Premiu Nacional de Música en 2020), y entamáu en collaboración cola Sociedad Filarmónica de Xixón y el Taller de Músicos de la Fundación Municipal de Cultura de Xixón. L’actuación va tener llugar el domingu 17 de payares nel Teatru de La Llaboral.

IV Amuesa de Cine y Sostenibilidá

Per cuartu añu consecutivu, el Festival Internacional de Cine de Xixón presenta una nueva edición de l’Amuesa de Cine y Sostenibilidá. El ciclu va proyectar tres filmes nel Xardín Botánicu Atlánticu de Xixón ente’l 6 y el 8 de setiembre. Películes qu’aborden retos de l’Axenda 2030 de les Naciones Xuníes, cola idea de contribuyir al desarrollu sostenible. Toles proyecciones van empezar a les 21:30 hores de la nueche con entrada llibre hasta completar aforu. La programación, pensada pa tola familia, va ser la siguiente:

Vienres 6 de setiembre

Historia de pastores (Jaime Puertas). La hestoria del casual alcuentru ente una apasionada polos cortixos abandonaos que, col ánimu de caltener la memoria arquiteutónica tradicional, dedícase a catalogalos dixitalmente, y dos pastores con venceyos simbólicos coles fuercies de la natura. Una película ente la comedia y la ciencia ficción, cola que Jaime Puertas collechó escelentes crítiques nos festivales de Rotterdam y Málaga.

_{Historia de pastores de Jaime Puertas}

Sábadu 7 de setiembre

Perfect Days (Wim Wenders). La última película del aclamáu director alemán ye una oda a la guapura de lo cotidiano qu’asitia a los sos protagonistes na ciudá de Tokio. Dirixida pol maestru alemán Wim Wenders, la película foi galardonada en Cannes y darréu foi escoyida pa representar a Xapón nos Premios Óscar de 2024, resultando nominada.

_{Perfect Days de Wim Wenders}

Domingu 8 de setiembre

El mal no existe (Ryûsuke Hamaguchi). Nesta película, el cineasta xaponés ganador del Oscar por Drive My Car (2021), céntrase na hestoria d’una comunidá rural que s’opón a la causa d’un desequilibriu ecolóxicu. Con esti filme Hamaguchi ganó en Venecia’l Lleón de Plata Gran Premiu del Xuráu y el Premiu FIPRESCI de la crítica internacional el pasáu 2023.

_{El mal no existe de Ryûsuke Hamaguchi}